Abaı oblysynda 12 bala jol-kólik oqıǵasynan kóz jumǵan
ASTANA. KAZINFORM — Oqý jyly aıaqtalǵan kezeńde Abaı oblysynda jol qaýipsizdigine qatysty túsindirý jumystary kúsheıtildi, dep habarlaıdy oblystyq PD baspasóz qyzmeti.
18–25 mamyr aralyǵynda Abaı oblysynyń aýmaǵynda balalardyń qaýipsizdigin qamtamasyz etý jáne jol-kólik oqıǵalarynyń aldyn alý maqsatynda «Abaılańyz, balalar!» jedel profılaktıkalyq is-sharasy ótkizilip jatyr.
Іs-sharanyń negizgi maqsaty — jol-kólik oqıǵalaryn eskertý jáne olardyń aldyn alý, sondaı-aq jasóspirimderdiń quqyqtyq saýattylyǵyn arttyrý bolyp tabylady. Bul baǵytta oblystyń barlyq bilim berý uıymdarynda oqýshylarmen jáne ata-analarmen arnaıy kezdesýler uıymdastyrylyp, kámeletke tolmaǵandardyń qatysýymen bolatyn jol-kólik oqıǵalary men olardyń zardaptary týraly naqty mysaldar keltiriledi. Sonymen qatar, atalǵan taqyryptarda lektsııalar men áńgimeler ótkizilip, balalarǵa qaýipsiz minez-qulyq daǵdylary qalyptastyrylady.
— «Abaılańyz, balalar!» aktsııasy — tek jol qaýipsizdigin saqtaý ǵana emes, sonymen qatar balalardyń quqyqtyq saýattylyǵyn arttyrý jáne qoǵam múshelerin balalardyń qaýipsizdigi máselesine beı-jaı qaramaýǵa shaqyratyn mańyzdy joba. Tek byltyrǵy jyldyń ózinde oblysymyzda 12 bala Jol-kólik oqıǵasynan kóz jumdy. Ata-analar men oqýshylardan jolda abaı bolýdy, qaýipsizdik erejelerin saqtaý men ózara syılastyqty arttyrýǵa shaqyramyz. Birge jasalǵan árbir qadam — bolashaq urpaqtyń ómirin qorǵaýǵa qosqan úles, — dep eskertti tártip saqshylary.
Osyǵan deıin Túrkistan oblysynda jarysqa bara jatqan 3 jasóspirim jol apatynan kóz jumǵanyn jazǵanbyz.
