Abaı oblysynda 100-ge jýyq kólik qar qursaýynda qaldy

SEMEI. KAZINFORM — Abaı oblysynda qatty boran saldarynan kólikter jolda qalyp jatyr.

«Qazavtojol» UK málimetine súıensek, keshe saǵat 23:00–den bastap «Almaty-Taldyqorǵan-Óskemen» tasjolynyń Taskesken aýyly men Aıagóz qalasy aralyǵyndaǵy jol jabyldy. 

— Áýeli júk kólikteriniń, keıin jeńil kólikterdiń qozǵalysyna tyıym salyndy. Barlyǵy 100-ge jýyq kólik qar qursaýynda qalyp qoıǵan. Olarǵa kómektesý úshin 20-ǵa jýyq aýyr tehnıka jumyldyryldy, — delingen aqparatta.

Jol qyzmetteri 60-tan astam kólikti qardan shyǵardy. Aıagóz qalasyna 3 avtobýs jetkizildi.

Jylytý pýnktine 77 adam, onyń ishinde úsh bala ornalastyryldy. 

Qazirgi ýaqytta Taskesken men Aıagóz arasyndaǵy jol ýchaskesi áli de jabyq tur.

Eske salsaq, buǵan deıin áleýmettik jelide Óskemen qalasynda tótenshe jaǵdaı engizilgeni týraly tarap jatqan aqparat shyndyqqa sáıkes kelmeıtindigi habarlanǵan.