Abaı oblysynda 10-synyp oqýshysy bir aptada erekshe mobıldi oıyn jasap shyǵardy
SEMEI. KAZINFORM — Abaı oblysynyń oqýshysy respýblıkalyq oıyn jasaý baıqaýynda jeńimpaz atanyp, 1 mln teńge jeńip aldy.
Abaı oblysyndaǵy «Bilim-ınnovatsııa» lıtseıiniń 10-synyp oqýshysy Jalǵas Týken respýblıkalyq GDC GameJam baıqaýynda top jardy. Bul baıqaýdy Astana Hub pen Grand Mobile uıymdastyrǵan. Onda eldiń ár óńirinen kelgen 25 komanda qatysty.
Oıyn sharty boıynsha bir apta ishinde óz oıynyn jasap shyǵýlary kerek. Jalǵas osy saıysta «Bombergirl» mobıldi oıynyn usynyp, bas júldeni jeńip aldy.
— Oıynnyń mazmuny boıynsha, bas keıipker Hollı týǵan qalasyn vırýs pen tehnıkalyq aqaýlardan qutqarýy tıis. Oıyn barysynda túrli tapsyrma oryndap, sıýjet boıynsha jańa málimet ashylady. Qalanyń turǵyndaryna kómektesý úshin ártúrli kedergilerden ótý qajet. «Bombergirl» oıyny Unity platformasynda jasalyp, C# baǵdarlamalaý tilinde jazylǵan. 2D formatta ázirlengen joba ózine tán kórkemdik stıli, jaryq pen dybys effektilerimen erekshelenedi. Oıyn kartasy ár joly jańa algorıtmmen avtomatty túrde jasalady. Sondyqtan ár oınaǵanda jańa orta paıda bolady, — dep habarlady oblystyq Bilim basqarmasynyń baspasóz qyzmetinen.
Qazir oıyn Play Market-ke shyǵýǵa daıyndalyp jatyr. Aldaǵy ýaqytta iOS júıesine de beıimdelmek. Oıyn tek aǵylshyn tilinde, biraq bolashaqta qazaq, orys jáne basqa tilderdi qosý josparda bar.
— Jalǵas bolashaqta bul oıyndy damytyp, jańa deńgeıler qosý, monetızatsııa engizý jáne kásibı stýdııalarmen birlesip jumys isteýdi josparlap otyr. Júldeden túsken qarjyǵa ol kásibı sýretshi jaldap, tehnıkalyq qural-jabdyqtaryn jańartpaq, — delingen aqparatta.
Eske salsaq, osyǵan deıin almatylyq oqýshylar NASA baıqaýynda jeńiske jetkeni habarlanǵan.