Abaı oblysynda 10 myńnan astam oqýshy qashyqtan oqýǵa kóshirildi

SEMEI. KAZINFORM - Abaı oblysynda maýsymdyq ınfektsııalardyń órshýine baılanysty mektep oqýshylary ýaqytsha qashyqtan oqytý formatyna kóshirilip jatyr.

Sheshim oblystyń bas memlekettik sanıtarııalyq dárigeriniń 2025 jylǵy 22 tamyzdaǵy №6 qaýlysyna sáıkes qabyldanǵan. Soǵan sáıkes, synyptaǵy naýqastar úlesi 30 paıyz jáne odan joǵary deńgeıge jetken jaǵdaıda oqytý onlaın formatqa aýystyrylady.

Qazirgi ýaqytta óńir boıynsha 10 073 oqýshy qashyqtan bilim alyp jatyr. Onyń 9 870-i – Semeı qalasynyń oqýshylary. Aqsýat, Aıagóz jáne Besqaraǵaı aýdandaryndaǵy 203 bala da mektepke barmady.

- Oblysta 304 mektep bar, olarda jalpy sany 99 391 oqýshy bilim alady. Búginde 246 mektep dástúrli formatta jumys istep jatyr, al 58 mektepte jekelegen synyptar qashyqtan oqytýǵa aýystyryldy, - dep habarlady oblystyq bilim basqarmasynyń baspasóz qyzmetinen.

Vedomstvo ókilderiniń aıtýynsha, mundaı sharalar maýsymdyq ınfektsııalardyń taralý qaýpin jedel tómendetýge múmkindik beredi.

Dárigerler ata-analarǵa balalardyń jaǵdaıyn muqııat baqylap, syrqattanýdyń alǵashqy belgileri baıqalǵanda birden medıtsınalyq kómekke júginýge keńes beredi.

Eske salsaq, osyǵan deıin ShQO-da 23 mekteptiń 169 synyby onlaın oqytý formatyna kóshirilgeni habarlanǵan.