Abaı oblysynda 1 700-den astam bıýdjet qyzmetkerine 80,4 mln teńge áleýmettik kómek tólendi
ASTANA. KAZINFORM – Abaı oblysynyń Aqsýat aýdanynda prokýratýranyń qadaǵalaý aktisi negizinde bıýdjet salasynda jumys isteıtin 1 705 qyzmetkerdiń áleýmettik kómek alý quqyǵy qalpyna keltirildi.
Prokýratýra júrgizgen tekserý barysynda 2025 jyly aýyldyq eldi mekenderde turatyn jáne eńbek etetin densaýlyq saqtaý, áleýmettik qamsyzdandyrý, bilim berý, mádenıet, sport jáne veterınarııa salalaryndaǵy memlekettik uıymdardyń mamandaryna kommýnaldyq qyzmetterdi tóleýge jáne otyn satyp alýǵa arnalǵan áleýmettik qoldaý kórsetilmegeni anyqtalǵan.
Qazaqstan Respýblıkasy Áleýmettik kodeksiniń 70-babynyń talaptaryn buza otyryp, alty memlekettik mekeme 1 705 qyzmetkerge jalpy somasy 80,4 mln teńge kólemindegi áleýmettik kómekti tólemegen.
– Atalǵan áleýmettik qoldaý sharasy Aqsýat aýdandyq máslıhatynyń sheshimimen kózdelgen jáne bıýdjet qarajaty esebinen jylyna bir ret 12 aılyq eseptik kórsetkish mólsherinde beriledi, – delingen prokýratýra habarlamasynda.
Prokýrorlyq qadaǵalaý aktisi negizinde anyqtalǵan zań buzýshylyqtar joıylyp, qyzmetkerlerdiń quqyqtary tolyq kólemde qalpyna keltirildi.
– Qyzmetkerlerge tıesili áleýmettik kómek tolyq kólemde tólendi. Oblys prokýratýrasynyń azamattardyń áleýmettik qamsyzdandyrýǵa qatysty konstıtýtsııalyq quqyqtaryn qorǵaý baǵytyndaǵy jumysy jalǵasýda, – dep málimdedi vedomstvo.
Aıta keteıik, Qazaqstanda 36 myńǵa jýyq jumyskerdiń eńbek quqyǵy qorǵalǵany habarlandy.
