Іri ónerkásiptik joba: Abaı oblysyna Qytaıdan 4 mlrd dollar ınvestıtsııa tartylady
SEMEI. KAZINFORM — Oblys ákimi Berik Ýálı bastaǵan óńir delegatsııasy 25-28 maýsym kúnderi Qytaı Halyq Respýblıkasyna baryp, Úrshimshi, Beıjiń, Ordos qalalarynda birqatar iskerlik kezdesý ótkizip, mańyzdy kelisimderge qol jetkizdi.
Osy sapar qorytyndysynda Abaı oblysy men Qytaı kompanııalary arasynda jalpy quny 4 mıllıard AQSh dollaryn quraıtyn memorandýmǵa qol qoıyldy. Demek, óńirge osynsha kólemde ınvestıtsııa quıylady.
Aımaq basshysy Beıjiń qalasynda «DDS Group» jáne Jiachen Group kompanııalarynyń basshylyǵymen kezdesti. «DDS Group» — ónerkásiptik jańǵyrtý, ınfraqurylymdyq qurylys jáne ındýstrııalyq parkterdi damytý salasynda jumys isteıtin halyqaralyq ınjınırıngtik jáne ınvestıtsııalyq kompanııa. Álemniń 30-dan astam elinde qyzmet atqaratyn kompanııa ınvestıtsııalaý, jobalaý, qurylys jáne paıdalanýdy qamtıtyn tolyq tsıkldi jobalardy júzege asyrady. Ónerkásiptik parkterdi, kólik ınfraqurylymyn, turǵyn úı jáne óndiristik nysandardy salýda mol halyqaralyq tájirıbege ıe. Kezdesý qorytyndysynda jalpy quny 1,5 mıllıard AQSh dollaryn quraıtyn memorandýmǵa qol qoıyldy. Kompanııa Maqanshy aýdanynyń Baqty aýylynda jalpy aýmaǵy 3 000 gektar bolatyn ónerkásiptik park qurylysyn bastaýdy josparlap otyr.
Qytaıdyń jetekshi ónerkásiptik holdıngteriniń biri — Jiachen Group kompanııasy metallýrgııa, taý-ken óndirisi, otqa tózimdi materıaldar shyǵarý, logıstıka jáne halyqaralyq saýda salalarynda jumys isteıdi. Kezdesý nátıjesinde Abaı oblysynyń ákimdigi, Liaoning Jiachen Holding Group jáne Xinjiang Sanbao Industrial Group kompanııalary arasynda Abaı oblysy, Maqanshy aýdanynda alıýmınıı zaýytyn salý jobasyn iske asyrý úshin ózara túsinistik týraly memorandýmǵa qol qoıyldy. Joba quny 1 mıllıard AQSh dollaryn quraıdy.
Oblys ákimi Qytaı Halyq Respýblıkasynyń Ordos qalasynda «Іshki Mońǵolııa Vantszıan Invest» kompanııasymen ózara yntymaqtastyq týraly memorandýmǵa qol qoıdy. Qujat aıasynda Abaı oblysynda jylyna 300 myń tonna alıýmınıı ónimin shyǵaratyn zaýyt salý, sondaı-aq, jalpy qýattylyǵy 1 GVt bolatyn jel elektr stantsııalaryn iske asyrý josparlanýda. Jobalardyń jalpy ınvestıtsııalyq quny 1,5 mlrd AQSh dollaryn quraıdy.
Atalǵan bastamalar óńirdiń ónerkásiptik áleýetin arttyrýǵa, jańartylatyn energııa kózderin damytýǵa, jańa jumys oryndaryn ashýǵa jáne oblys ekonomıkasyna tyń serpin berýge baǵyttalǵan.
Aımaq basshysy bul jobalardyń Abaı oblysy úshin strategııalyq mańyzy zor ekenin atap ótip, ınvestorlarmen birlesken jumysty júıeli túrde jalǵastyrýǵa daıyn ekenin jetkizdi.
Berik Ýálı Ordos qalasyndaǵy jetekshi óndiris oryndary «China Railway Construction Engineering Group» (CRCEG), «Inner Mongolia Wanzhong Yinuan Technology Co., Ltd», «Ordos Wanpu Shanfang Food Co., Ltd» kompanııalarynyń jumysymen de tanysty.
Erekshe atap óterligi, osy sapar aıasynda Qytaı Halyq Respýblıkasynyń Shyńjań Uıǵyr avtonomııalyq aýdanynyń ákimshilik ortalyǵy Úrimshi qalasynda «Semeı» áleýmettik-kásipkerlik korporatsııasy» AQ-nyń ınvestıtsııalyq-servıstik keńsesi ashyldy.
Jańa ınvestıtsııalyq-servıstik keńse Abaı oblysynda jobalardy júzege asyrýǵa qyzyǵýshylyq tanytqan qytaılyq ınvestorlar men kásipkerlerge aqparattyq-konsýltatsııalyq jáne uıymdastyrýshylyq qoldaý kórsetedi. Keńse áleýetti ınvestorlardyń ótinishterin qabyldap, bastapqy taldaý júrgizedi, jobalyq materıaldardy ázirleýge járdemdesedi, iskerlik kezdesýler uıymdastyryp, usynystardy ári qaraı qaraý úshin «Semeı» áleýmettik-kásipkerlik korporatsııasyna joldaıdy.
