Abaı oblysyna ınvestıtsııalyq jobalar aıasynda qansha qarajat tartylady

ASTANA. KAZINFORM – Abaı oblysynda ınvestıtsııalyq jobalar pýly aıasynda 2 trln teńgeniń 23 jobasy engizildi. Bul týraly Ortalyq kommýnıkatsııalar qyzmetindeni baspasóz máslıhatynda osy óńirdiń ákimi Nurlan Uranhaev málim etti.

«Memleket basshysynyń tapsyrmasymen oblystyń áleýmettik-ekonomıkalyq damýynyń 2023-2027 jyldarǵa arnalǵan keshendi jospary Úkimettiń qaýlysymen bekitilgenin bilesizder. Onyń ınvestıtsııa kólemi 1,9 trln teńgege 102 is-sharany qamtıdy. Bıyl 286,1 mlrd teńgege 74 is–sharany iske asyrý bastalyp, jeteýi qazirdiń ózinde aıaqtaldy. Quny – 4,9 mlrd teńge. Qalǵan jobalar josparǵa sáıkes 2025-2027 jyldar aralyǵynda iske asady», - dedi N. Uranhaev.

Onyń aıtýynsha, 2028 jylǵa deıingi ınvestıtsııalyq jobalar pýly jasaqtaldy. Oǵan 7 myń jumys ornyn qamtıtyn 2 trln teńgeniń 23 jobasy engizildi.

«Qazir 7,5 mlrd teńgeniń 6 ınvestıtsııalyq joba iske asyp, 225 jumys orny ashyldy. Jyl sońyna deıin 1,6 mlrd teńgege taǵy 2 jobany engizý josparlanǵan. Іri ınvestıtsııalyq jobalardyń biri – jalpy kólemi 560,5 mlrd teńgeni quraıtyn «Aıdarly» mys ken ornynda taý-ken baıytý kombınatyn salý. Jobalyq qýattylyǵy – jylyna 50 mln tonna ken óndirý. 1 myń jumys ornyn qurý eskerilgen. Budan basqa, maýsym aıynda Úkimette 1,5 mlrd dollarǵa iri mys balqytý zaýytyn salýǵa kelisimge qol qoıyldy. Jobalyq qýaty – jylyna 300 myń tonna mys shyǵarý. 1 myń jumys orny qurylady. Bul álemdegi eń iri mys kenishteriniń birin jáne qazirgi zamanǵy mys balqytý óndirisin biriktiretin klaster bolady», - dedi oblys ákimi.

Buǵan deıin Nurlan Uranhaev 9 aı qorytyndysy boıynsha oblystyń áleýmettik-ekonomıkalyq damý kórsetkishteri óskenin aıtty.