Abaı oblysy Jańasemeı aýdanynda kóktemgi dala jumystaryna qajetti tehnıka saqadaı saı
SEMEI. KAZINFORM – Abaı oblysy Jańasemeı aýdanynda egistik jumystary júrýde.
Oblys ákimdiginiń málimetine súıensek, Jańasemeı aýdanynyń egistik alqaby – 12 314 gektar. Egistik jumystaryna 51 sharýashylyq sýbekti qatysyp, olar úı janyndaǵy jáne saıajaı ýchaskelerinde aýyl sharýashylyǵy daqyldaryn egý jumystaryn júrgizedi.
«Jeke aýlalarda aýyl sharýashylyǵy daqyldary egilmek. Atalǵan alqapta 427 ga dándi daqyl, 1 064,3 ga kartop, 370 ga kókónis jáne baqsha, 3 990,3 ga maıly daqyl, mal azyqtyq daqyldar 6 443,5 ga, jemis-jıdekter 18,8 ga ósirý josparlanyp otyr. 2024 jyly aýdannyń sharýashylyqtary sapaly tuqymmen qamtamasyz etildi. 427 ga alqapqa dándi daqyl egý úshin 19 tonna sýbsıdııalanǵan tuqymdy sharýashylyqtar óz qarajattaryna satyp alýda. Sonymen qatar 85 tonna kúnbaǵystyń, 13 tonna bir jyldyq jáne 12,6 tonna kópjyldyq shópterdiń tuqymy satyp alynady. Búginde sýbsıdııa alý úshin qajetti qujattar ázirlenip jatyr», - delingen aqparatta.
Qazir aýdanda kóktemgi dala jumystaryna tehnıka jetkilikti. Onyń ishinde traktordyń barlyq túrinen 686 traktor (624 dóńgelekti, 62 shynjyr tabandy), 71 soqa, 56 kýltıvator, 36 tuqym sepkish jáne 239 júk kóligi bar.
Óńirdiń aýyl sharýashylyǵy qurylymdary kóktemgi dala jumystaryn ońtaıly agrotehnıkalyq merzimde júrgizýdi qamtamasyz etedi.
