Abaı oblysy túzeý mekemesindegi kisi ólimi: bir jyl burynǵy iske sot úkimi shyqty
ASTANA.KAZINFORM - Abaı oblysynyń túzeý mekemesinde bolǵan kisi ólimine qatysty sot úkimi shyǵaryldy. Sottalýshy túrmeniń sanıtarlyq bóliminde taǵy bir tutqyndy ólimshi etip sabaǵan.
Qaıǵyly oqıǵa 2025 jyldyń sáýirinde QR Іshki ister mınıstrliginiń 20-shy Qylmystyq-atqarý júıesi mekemesinde bolǵan.
Eki sottalýshynyń arasynda jeke jáne dinı kelispeýshilikterge baılanysty qaqtyǵys týyndap, ol tóbeleske ulasqan.
Іs materıaldaryna sáıkes, ózara qorlaýdan keıin jábirlenýshi birinshi bolyp kúsh qoldanyp, qarsylasyn uryp, edenge qulatqan. Alaıda, sot keıingi áreketterdi aldyn ala oılastyrylǵan kisi óltirý dep baǵalady.
Sot qujattaryna sáıkes, «jaýap retinde sottalýshy aǵash sypyrǵyshty alyp, jábirlenýshiniń denesi men basynan birneshe ret urǵan, sońǵysy qarsylyq kórsetý qabiletin joǵaltqannan keıin de jalǵasqan».
Er adam esin jımaı mekemeniń medıtsınalyq ortalyǵynda alǵan jaraqattarynan qaıtys bolǵan.
Sottalýshy kinásin moıyndamady. Onyń qorǵaýshysy isti ózin-ózi qorǵaý barysynda abaısyzda ólimge ákep soqtyrǵan dep qaıta jikteýdi talap etti.
Alaıda, sot bul dálelderdi qabyldamady.
Anyqtalǵandaı, sottalýshynyń kinási kýágerlerdiń aıǵaqtary men sarapshylardyń qorytyndylaryn qosa alǵanda, dáleldemelerdiń jıyntyǵymen rastaldy. Sot-medıtsınalyq saraptama ólimniń travmatıkalyq shokpen asqynǵan aýyr jaraqattardan bolǵanyn kórsetti.
«Affekt jaǵdaıyn jarııalaýǵa nemese medıtsınalyq májbúrleý sharalaryn qoldanýǵa negiz bolǵan joq. Sondaı-aq, qaqtyǵystyń eki tarapy da agressıvti minez-qulyqqa beıim retinde arnaıy esepte turǵany anyqtaldy», - dep atap ótti sot.
Sot qaqtyǵystyń jábirlenýshiniń zańsyz áreketterinen týyndaǵanyn eskerip, muny jeńildetetin mán-jaı dep tapty. Aýyrlatatyn faktorlar anyqtalǵan joq.
Nátıjesinde sottalýshy kisi óltirýge kináli dep tanyldy. Aldyńǵy jazadan ótelmegen merzimin eskere otyryp, ol 11 jyl 6 aıǵa bas bostandyǵynan aıyrý jazasyna kesildi. Ol jazasyn qatań qaýipsizdik mekemesinde óteıdi.
Úkim kúshine endi.
Buǵan deıin Atyraý erler túrmesinde bolǵan janjal kezinde tutqynnyń qaza tapqany habarlanǵan bolatyn.
