Abaı oblysy Shar qalasynda kúrdeli jóndeýden ótken Mádenıet úıi qaıta ashyldy
SEMEI. KAZINFORM — Respýblıka kúni qarsańynda Jarma aýdanynyń Shar qalasynda kúrdeli jóndeýden ótken qalalyq Mádenıet úıi paıdalanýǵa berildi, dep habarlaıdy Abaı oblysy ákimdiginiń baspasóz qyzmeti.
Ashylý saltanatyna oblys ákimi Berik Ýálı, zııaly qaýym ókilderi jáne jergilikti turǵyndar qatysty.
Shar qalalyq Mádenıet úıi 1960 jyly boı kóterdi. Sońǵy ret nysanǵa 2002 jyly jóndeý júrgizilip, syrtqy qaptamasy jańartylyp, edenderi aýystyrylyp, sý júıesi tartylǵan bolatyn.
Bıyl «Jol kartasy» baǵdarlamasy aıasynda oblystyq bıýdjetten qarjy bólinip, ǵımaratqa tolyq kúrdeli jóndeý júrgizildi. Shatyry aýystyrylyp, barlyq tereze, esik jáne eden jabyndary jańartyldy. Sý, jylý jáne káriz júıeleri aýystyrylyp, jańa jylý qazandyǵy iske qosyldy. Sahna keńeıtilip, zamanaýı jaryq jáne dybys qurylǵylary, sondaı-aq LED ekran ornatyldy. Qosymsha bólmeler salyndy.
Aıta keteıik, bıylǵy maýsym aıynda aımaq basshysy Jarma aýdanyna jumys saparymen kelgende Shardaǵy Mádenıet úıin aralap, merdiger kompanııaǵa jóndeý jumystaryn sapaly ári ýaqytynda aıaqtaýdy tapsyrǵan bolatyn.
Oblys ákimi eldi meken turǵyndaryn mańyzdy mádenı nysannyń qaıta ashylýymen quttyqtady.
— Biz búgin Respýblıka kúni qarsańynda Shar qalalyq mádenıet úıiniń qaıta ashylý saltanatynda bas qosyp otyrmyz. Kóktemde osynda kelgen kezimde burynǵy ǵımaratty qaıta jańǵyrtý týraly sheshim qabyldaǵan bolatynmyn. Mine, búgin ádemi, keń, jaryq, bıik, sý jańa Mádenıet úıin ózderińizben birge ashqaly turmyz. Memleket basshysy Qasym-Jomart Toqaev bıylǵy Qazaqstan halqyna arnaǵa Joldaýynda «til, mádenıet, rýhanııat máselesi ulttyq múddeniń ózegi retinde sanalatyn. Árıne, bul durys, árqaısysy ult bolmysynyń arqaýy» dep aıryqsha atap ótken bolatyn. Biz de osy baǵytty basshylyqqa ala otyryp, mádenıet nysandaryn jańǵyrtý isine basa mán berip kelemiz. Shar qalasyndaǵy ǵımaraty tolyq kúrdeli jóndeýden ótken bul óner ordasy óńirdiń mádenı tynysyn jandandyryp, qala turǵyndarynyń rýhanı ómirinde erekshe oryn alady dep senemiz. Bul jerde shyǵarmashylyq ujymdar óz ónerin shyńdap, jastar rýhanı tárbıe alyp, túrli mádenı sharalar uıymdastyrylatyn bolady. Osy ıgi istiń júzege asýyna atsalysqan qurylysshylarǵa, jobalaýshylarǵa, mádenıet salasynyń qyzmetkerlerine jáne barsha turǵyndarǵa shynaıy rızashylyǵymdy bildiremin. Sharǵa osymen úshinshi ret kelip otyrmyn. Qalanyń damýy únemi meniń nazarymda, jeke baqylaýymda bolady, — dedi oblys ákimi.
Jergilikti turǵyndar Mádenıet úıiniń jańǵyryp, qaıta ashylýyn jyly qabyldap, úles qosqandarǵa rızashylyqtaryn bildirdi.
— Búgin Shar qalasy turǵyndary úshin aq túıeniń qarny jarylǵan kún dep aıtýǵa bolady. Mádenıet úıimizdiń qaıta jańaryp, jarqyraǵan sátine kýá bolyp otyrmyz. Shar qalasynda basseın qurylysy bastaldy. Kelesi jyly birneshe kósheniń joly jóndeletinin aıtty. Oblys basshylyǵyna alǵys aıtamyz, — dedi qala turǵyny Talǵat Qumarov.
Aımaq basshysy «Káýsar» halyq ult-aspaptar orkestri jáne «Sulýym» estradalyq qyzdar tobynyń kontserttik baǵdarlamasyn tamashalady.
Bıyl óńirde birqatar mádenı nysandar jańartyldy. Abaı aýdanynyń Qaraýyl aýylyndaǵy Mádenıet úıine, Abaı atyndaǵy oblystyq ámbebap kitaphanaǵa, Abaı atyndaǵy teatrǵa jáne Semeı qalasyndaǵy F. M. Dostoevskıı atyndaǵy ádebı-memorıaldyq murajaıdyń shatyryna aǵymdaǵy jóndeý jumystary júrgizildi. Respýblıkalyq mańyzy bar tarıhı-sáýlet eskertkishi sanalatyn oblystyq tarıhı-ólketaný mýzeıinde kúrdeli jóndeý jumystary bastaldy.
2025 jyly aımaqtyń mádenı ınfraqurylymyn damytý maqsatynda respýblıkalyq bıýdjet esebinen bes jańa nysannyń qurylysyna qarjy bólindi. Atap aıtqanda, Úrjar aýdanyndaǵy Joǵarǵy Eginsý aýylynda «Aýyl — el besigi» baǵdarlamasy aıasynda 100 oryndyq klýbtyń qurylysy aıaqtalýǵa jaqyn. Sondaı-aq Borodýlıha aýdanynyń Kamyshenka, Novopokrovka, Besqaraǵaı aýdanynyń Begen, Glýhovka jáne Ernazar aýyldarynda, Aqsýat aýdanynyń Kókjyra aýylynda jańa Mádenıet úıleriniń qurylysy júrgizilip jatyr.