Abaı oblysy Sarjal aýylynda qymyz óndirisi damyp keledi
SEMEI. KAZINFORM – Abaı oblysy Abaı aýdanyndaǵy Sarjal aýylynda qymyz óndirisi damyp keledi.
Búginde oblystaǵy eldi mekenderdi damytý strategııasy sheńberinde Jol kartasy ázirlenip, júzege asyrylyp jatyr. Buǵan Aqmola oblysy Tselınograd aýdanyna qarasty Rodına aýylynyń tabysty tájirıbesi negiz bolyp otyr.
«Rodına aýylyna barǵan byltyrǵy saparymyz jaqsy áser qaldyrdy. Biz jergilikti óndiristik kásiporyndardyń jumysymen jan-jaqty tanystyq. Endi sodan kórgenimizdi Abaı aýdanyn damytý úshin qoldanamyz. Aldaǵy ýaqytta da osylaı úzdik tájirıbelerdi eskere otyryp, aýdan turǵyndarynyń jaıly ómir súrýi úshin jaǵdaı jasaımyz», - dedi Abaı aýdany ákiminiń orynbasary Erbolat Ákimbaev.
Abaı aýdanynyń Sarjal aýyldyq okrýginde qymyz óndirisi qarqyndy damyp keledi. «Jarylǵasyn» sharýa qojalyǵy 2021 jyldan beri kúnine 100 lıtrge deıin qymyz óndiredi.
Qazirgi ýaqytta kún saıyn aýyl turǵyndary úshin qymyz qabyldap, ony óndirý jáne arnaıy bótelkelerge quıý boıynsha joba ázirlenýde. Óndiristi táýligine 5 tonnaǵa deıin ulǵaıtýmen birge ónimdi respýblıkalyq naryqqa shyǵarý jáne qosymsha jabdyqtar satyp alý kózdelýde. Bul óz kezeginde jańa jumys oryndarynyń ashylýyna sep bolmaq. Aldaǵy jospar boıynsha qymyz quıýǵa arnalǵan bótelke shyǵaratyn qurylǵydan basqa qajetti birneshe jabdyq satyp alý mindeti tur. Sondaı-aq qymyzdyń untaq túri men saýmaldan balmuzdaq shyǵarý kózdelip otyr.
Aıta keteıik, Abaı oblysynyń delegatsııasy Rodına aýylyna tájirıbe almasý jáne tanysý maqsatynda baryp qaıtqan edi. Delegatsııa quramynda 10 aýyldyq okrýg ákimderi men iri kásipkerler bolǵan.
