Abaı oblysy PD qatary jyl basynan beri 68 jas mamanmen tolyqty
ASTANA. KAZINFORM — Abaı oblysy polıtsııa departamenti qyzmetine qabyldanǵan jańa býyn ókilderi ishki ister organdarynyń túrli baǵyttarynda óz mindetterin atqarýǵa kiristi.
Vedomstvonyń baspasóz qyzmetiniń málimetinshe, olardyń qatarynda patrýldik polıtsııa qyzmetkerleri, tergeýshiler, jedel ýákilder, ýchaskelik ınspektorlar jáne JQAJ bólimsheleriniń mamandary bar. Árbir qyzmetker kásibı irikteýdiń kezeńderinen ótip, zamanaýı talaptarǵa saı arnaıy daıarlyq baǵdarlamalaryn meńgergen.
Jańa kadrlardy daıarlaý barysynda mamandardyń azamattarmen tıimdi kommýnıkatsııa ornatýy, quqyq buzýshylyqtyń aldyn alý, qoǵammen ashyq dıalog júrgizýi sekildi mańyzdy baǵyttarǵa basymdyq berilgen. Bul — polıtsııa qyzmetiniń servıstik modelin jetildirýge baǵyttalǵan strategııalyq ustanymnyń kórinisi.
— Qoǵamdyq qaýipsizdikti qamtamasyz etý — memleket turaqtylyǵynyń negizgi tirekteriniń biri. Jas mamandardyń kásibı áleýeti, jaýapkershilik deńgeıi jáne zamanaýı kózqarasy quqyq qorǵaý organdarynyń tıimdiligin kúsheıtýge múmkindik beredi. Jańa qyzmetkerler arnaıy kásibı daıarlyqtan ótip, zamanaýı talaptarǵa saı bilim men daǵdylardy meńgergen. Olar quqyq buzýshylyqtardyń aldyn alýǵa, azamattardyń qaýipsizdigin qamtamasyz etýge jáne zańdylyqty saqtaýǵa saqadaı saı. Qoǵamda quqyq qorǵaý organdaryna degen senimdi arttyrý — búgingi kúnniń basty mindetteriniń biri, — delingen habarlamada.
Bul baǵytta kásibı daıyndyqpen qatar, jeke quramnyń moraldyq beınesine de erekshe kóńil bólinip keledi. Qyzmetke qabyldanǵan árbir maman azamattarmen ashyq ári senimdi qarym-qatynas ornatýǵa, ózine júktelgen mindetterdi adal atqarýǵa yntaly. Іshki ister salasynda turaqty jumys oryndarynyń ashylýy, sondaı-aq jas mamandarǵa beriletin áleýmettik qoldaýlar — bul salaǵa qyzyǵýshylyq tanytqan azamattar úshin úlken múmkindik. Jańa býyn polıtseılerdiń kelýimen Abaı oblysynda quqyqtyq tártipti saqtaý jumystary jańa qarqyn alyp keledi.
Buǵan deıin Abaı oblysynda ekologııalyq talaptardy buzýdyń 7 myńnan asa deregi tirkelgenin jazǵanbyz.
