Abaı oblysy ozyq tehnologııalar jáne tsıfrlandyrý salasy boıynsha shet elmen tájirıbe almasady
SEMEI. KAZINFORM – Abaı oblysynyń ákimdigi shet elmen ozyq tehnologııalar jáne tsıfrlandyrý salasy boıynsha tájirıbe almasýdy kózdep otyr.
Óńir ákimi apparatynyń basshysy Jasulan Sársebaev bastaǵan Abaı oblysynyń delegatsııasy QHR ShUAA-na saparlap qaıtty. Sapardyń negizgi maqsaty zamanaýı tehnologııalar, qoǵamdyq tártip jáne tótenshe jaǵdaılardyń aldyn alý sııaqty negizgi salalarda tájirıbe almasý boldy. Kezdesý aıasynda delegatsııa músheleri birneshe ónerkásipti aralap, qytaılyq kásiporyndar men memlekettik organdar qoldanatyn ozyq tehnologııalar men ádisterdi zerttedi.
«Shyńjań-Uıǵyr avtonomııalyq aýdanyna barý bizge tsıfrlandyrý salasyndaǵy jańa tehnologııalarmen tanysyp qana qoımaı, óńirdiń damýyna yqpal etetin mańyzdy baılanystar ornatýǵa jol ashty. Bul sapar oblysymyzdyń negizgi salalaryndaǵy jumys tıimdiligin arttyrýǵa múmkindik beredi», - dedi oblys ákimi apparatynyń basshysy.
Qoǵamdyq tártipti qamtamasyz etý jáne tótenshe jaǵdaılardyń aldyn alý máselelerine erekshe nazar aýdaryldy. Delegatsııa ShUAA-nyń tıisti organdar jumysymen tanysyp, osy ádisterdi Abaı oblysyna engizý múmkindigin talqylady.
Budan bólek, delegatsııa Úrimji órt-qutqarý jasaǵynyń komandalyq ortalyǵyna, Shyńjań polıtsııa akademııasyna, Shyńjań baǵdarlamalyq qamtamasyz etý parkine, «GAC passenger Car Co., Ltd.» kompanııasynyń fılıalyna, Úrimji ortalyǵynyń mádenı josparlaý zaly men «Guyuanxiang» qoǵamdyq servıstik ortalyǵynda boldy.
«Búginde oblysta birqatar tsıfrlyq joba iske asyrylyp jatyr. Mysaly, 2024 jyly biryńǵaı baılanys ortalyǵyn tolyq iske qosý josparda bar. Bul aımaqtyń tirshiligin qamtamasyz etý máseleleri boıynsha ótinishterdi táýlik boıy qabyldaýdy júzege asyrady. Sonymen qatar memlekettik qyzmetter kórsetý tártibi máseleleri jáne Abaı oblysy ákimdiginiń qyzmetine qatysty basqa da máseleler boıynsha keńester bermek. Jobany iske asyrý aıasynda Semeıde 2022 jyldyń qazan aıynan bastap bir jarym myńnan astam «Sergek» kamerasy ornatyldy. Oblys ákimdigi tótenshe jaǵdaılardyń aldyn alý jáne anyqtaý júıesinde ozyq tehnologııalar men tsıfrlandyrýdy engizýdi kózdeýde», - dep habarlady oblys ákimdiginiń baspasóz qyzmetinen.
Aıta keteıik, bul sapar oblys ákimi men ShUAA partııa komıteti tóraǵasy arasynda jasalǵan yntymaqtastyq týraly memorandýmdy iske asyrý aıasynda uıymdastyrylǵan.
