Abaı oblysy men ShQO-da alǵashqy qar jaýyp, jol júrý qıyndady
SEMEI. KAZINFORM — Abaı oblysy men ShQO-da alǵashqy qar jaýyp, joldarda kólik qozǵalysyna shekteý qoıyldy.
Shyǵys Qazaqstan oblysynda alǵashqy qar jaýyp, qalaaralyq joldarda kóktaıǵaq paıda boldy. Aýa raıynyń kúrt nasharlaýyna baılanysty birqatar tasjolda kólik qozǵalysyna shekteý engizilip, jazǵy dóńgelekpen júrgen avtokólikterdiń jolǵa shyǵýyna tyıym salyndy.
Abaı oblysynda búgin qolaısyz aýa raıy kútiledi. Bul týraly oblystyq Tótenshe jaǵdaılar departamenti eskertti.
— 21 qazanda Abaı oblysynda jaýyn-shashyn (jańbyr, qar), kóktaıǵaq kútiledi. Oblystyń batysynda, soltústiginde jaıaý burqasyn bolady, — delingen TJD habarlamasynda.
Vedomstvonyń málimetinshe, batystan, soltústik-batystan soǵatyn jeldiń ekpini túnde oblystyń batysy, soltústigi men ortalyǵynda 15-20 m/s-qa jetedi. Kúndiz oblystyń soltústigi, ońtústigi men ortalyǵynda jeldiń ekpini 24-29 m/s-qa deıin kúsheıýi múmkin.
Semeı qalasynda jeldiń ekpini 15-20 m/s, keı ýaqyttarda 25 m/s bolady dep boljanyp otyr.
Qazgıdromettiń Abaı oblysy boıynsha 21-25 qazanǵa arnalǵan konsýltatıvtik boljamyna sáıkes, búgin óńirdiń basym bóliginde jańbyr men qar jaýyp, kóktaıǵaq bolady. Oblystyń batysy, soltústigi men ortalyǵynda jeldiń ekpini 15-28 m/s-qa jetedi. Aýa temperatýrasy +2…+7 gradýs bolady.
22-23 qazanda da jaýyn-shashyn men kóktaıǵaq kútiledi. Jeldiń ekpini 15-25 m/s-qa deıin jetýi múmkin. Túnde aýa temperatýrasy -3…+3, kúndiz 0…+5 gradýs bolady.
24 qazanda Abaı, Jarma, Kókpekti, Aqsýat, Úrjar jáne Maqanshy aýdandarynda azdaǵan qar jaýyp, kóktaıǵaq bolady. 25 qazanda jaýyn-shashynsyz aýa raıy kútiledi.
Semeıde búgin jańbyr men qar jaýyp, jeldiń ekpini 15-20 m/s, keı ýaqytta 25 m/s bolady. Aýa temperatýrasy +3…+5 gradýs shamasynda bolady.
Al Shyǵys Qazaqstan oblysynda da aýa raıy kúrt ózgeredi. Qazgıdromettiń boljamynsha, 21 qazanda óńirdiń basym bóliginde jańbyr, dymqyl qar jaýyp, kóktaıǵaq bolady. Oblystyń shyǵysy men taýly aýdandarynda qalyń qar jaýyp, jaıaý burqasyn kútiledi. Soltústikte, ońtústikte jáne ortalyqta jeldiń ekpini 15-28 m/s-qa jetýi múmkin.
Óskemende kúndiz jańbyr men qar jaýyp, jeldiń ekpini 15-23 m/s bolady dep boljanyp otyr. Aýa temperatýrasy +2…+4 gradýs shamasynda bolady.
Eske salsaq, buǵan deıin búgin Qazaqstannyń qaı joldary ashyq, qaısysy jabyq ekendigi týraly jazǵan bolatynbyz.
