Abaı oblysy memlekettik satyp alý basqarmasynyń basshysy aýysty

ASTANA. KAZINFORM — Oljas Qurmanbek Abaı oblysy memlekettik satyp alý basqarmasynyń basshysy bolyp taǵaıyndaldy, dep habarlaıdy oblys ákimdiginiń baspasóz qyzmeti.

Oljas Qurmanbekuly 1986 jyly 23 naýryzda Shyǵys Qazaqstan oblysy Óskemen qalasynda dúnıege kelgen.

2008 jyly QazGZÝ Almaty zań akademııasynda «Quqyqtaný» mamandyǵyn, 2011 jyly Abaı atyndaǵy Qazaq Ulttyq pedagogıkalyq ýnıversıtetinde «Menedjment» mamandyǵyn, 2013 jyly «Quqyqtaný» mamandyǵy boıynsha QR Prezıdentiniń janyndaǵy Memlekettik basqarý akademııasynyń magıstratýrasyn támamdaǵan. Zań ǵylymdarynyń magıstri akademııalyq dárejesi berilgen. Frantsııanyń Parıj qalasynda taǵylymdamadan ótken.

Eńbek jolyn 2008 jyly QR Básekelestikti qorǵaý Agenttiginiń is júrgizý jónindegi ınspektory bolyp bastaǵan.

Astana qalasynda QR Ulttyq ǵarysh agenttigi zań basqarmasynyń sarapshysy jáne bas sarapshysy bolyp jumys atqarǵan.

2014-2020 jyldary «Samuryq-Qazyna Ulttyq ál-aýqat qory» AQ-da zań departamentiniń bas zańgeri, satyp alý ádisnamasy qyzmetiniń basshysy laýazymdarynda eńbek etti.

2021-2022 jyldary Almaty qalasy ákimi apparaty biryńǵaı personaldy damytý qyzmetiniń bas ınspektory, 2022 jyly Almaty qalasy ákimi apparaty biryńǵaı personaldy basqarý qyzmetiniń bas ınspektory qyzmetterin atqardy.

Taǵaıyndalǵanǵa deıin Abaı oblysy ákimi apparaty basshysynyń orynbasary bolǵan.

Eske salsaq, buǵan deıin Óskemen qalasynyń ákimi taǵaıyndalǵanyn habarlaǵan edik. Sondaı-aq, Óskemen qalasynyń eks-ákimi Jaqsylyq Omar Shyǵys Qazaqstan oblysy ákiminiń keńesshisi bolyp taǵaıyndalǵany belgili boldy.