Abaı oblysy Kýrchatov qalasynda abattandyrý jumystary qarqyndy júrgizilýde
SEMEI. KAZINFORM – Abaı oblysyndaǵy Kýrchatov qalasynda abattandyrý jumystary qarqyndy júrgizilip jatyr.
Oblystyń áleýmettik-ekonomıkalyq damýy máseleleri jónindegi keńeıtilgen keńeste Kýrchatov ákimi Bolat Ábdirálıev qalada atqarylyp jatqan jumystar jóninde baıandama jasady. Búgingi tańda birqatar kórsetkish boıynsha oń dınamıka bar.
«Bıyl qum-qıyrshyq tas qospasyn óndirý úshin «Prıdorojnoe» ken ornyn ıgerýdi bastaý josparlanýda. Sondaı-aq eldegi eń iri janarmaı quıý stantsııalary jelisiniń quramyna kiretin zamanaýı janarmaı quıý stantsııasynyń qurylysy bastalmaq. Bolashaqta soda kúlin shyǵaratyn zaýyt qurý múmkindigi qarastyrylýda», - dedi ol.
2021 jyly bastalǵan 120 oryndyq «Topolek» balabaqshasyn qaıta jańartý aıaqtaldy. Jańa balabaqsha osy jyldyń 3 maýsymynda paıdalanýǵa berildi.
Qalalyq aýrýhanada qyzmet kórsetý jaǵdaılaryn jaqsartý úshin Call senter operatorlarynyń shtaty kóbeıtilip, tirkeýge úsh qyzmetker qosyldy. Birinshi qabatta kúrdeli jóndeý jumystary aıaqtalyp, endi úshinshi jáne tórtinshi qabattarǵa jóndeý jumystary júrgizilýde.
«Dene shynyqtyrý-saýyqtyrý kesheniniń qurylysy bastaldy. Aýla sportyn damytý aıasynda úsh sport alańynda jóndeý jumystary jáne shaǵyn fýtbol alańynyń qurylysy qolǵa alynǵan. Apattyq jaǵdaıdaǵy qubyrlarǵa jóndeý júrgizildi. Aýyz sýdyń tozyǵy jetken júıesin qaıta qurý úshin jobalyq-smetalyq qujattama ázirlenýde», - dedi Bolat Ábdirálıev.
Budan bólek, biryńǵaı jylý kózi men kárizdi tazartý stantsııasyn salý úshin jobalyq-smetalyq qujattama ázirlenip jatyr. Jaz kezinde qalanyń sáýlettik kelbetin jaqsartý maqsatynda bes kóppáterli úıdiń qasbetteri qaıta boıalyp, úsh ǵımaratta mýral salynady.
