Abaı oblysy Kókpekti aýdanynda úılerdi sý basý qaýpi seıilip, jaǵdaı turaqtaldy
SEMEI. KAZINFORM – Abaı oblysyndaǵy Kókpekti aýdanynda turǵyn úıler men aýlalardy sý basý qaýpi seıilip, jaǵdaı turaqtalyp qaldy.
Qarqyndy erigen qar Kókpekti aýdanyndaǵy eldi mekenderge qaýip tóndirdi. Qyzyl sýdyń úılerge kirýiniń aldyn alý úshin 4050 dana ydys-qap, 6300 tonna ınertti materıal tóselip, 3782 tekshe metr sý shyǵaryldy. Kóktemgi sý tasqynyn aldyn alý jumystaryna jalpy sany 161 adam, 28 tehnıka, 16 motopompa jáne 4 júzý quraly jumyldyrylǵan.
Oblys ákimi Nurlan Uranhaev jaǵdaıdy baqylaý maqsatynda Kókpekti aýdanyna bardy. Kókjaıyq, Aqoı, Úlkenbóken, Prıobrajenka, Terekti, Shuǵylbaı jáne Tassaı aýyldarynyń aýmaǵyna tikushaqpen barlaý júrgizildi.
«Jergilikti atqarýshy organ jáne «Qazseldenqorǵaý» qyzmetkerleri ınertti materıaldy tasymaldaý, qorǵanys bógetin ulǵaıtý, sýdy burý arnalaryn keńeıtý jumystarymen aınalysyp jatyr. Sý deńgeıi men bógetti táýlik boıy baqylaý úshin 4 gıdropost uıymdastyryldy. Sonymen qatar Kókjaıyq aýylynan kelgen qyzyl sý Shuǵylbaı aýylyn basý qaýpine baılanysty sýdy Talmenka ózenine baǵyttaý týraly sheshim qabyldandy. Qazirgi ýaqytta TJD, jergilikti atqarýshy organ kúshterimen sýdy burý úshin ınjenerlik jumystar júrgizilip jatyr», - dep habarlady oblys ákimdiginiń baspasóz qyzmetinen.
