Abaı oblysy qaıta qurylǵannan beri Úkimet rezervinen 44,3 mlrd teńge alǵan

ASTANA. KAZINFORM — Premer-mınıstr Oljas Bektenov Májilis depýtattarynyń saýalyna joldaǵan jaýapta Abaı oblysyn damytýǵa qandaı kózderden qarajat bólinip jatqanyn aıtqan.

— Abaı oblysy qurylǵan sátten bastap Úkimet rezervinen jalpy somasy 44,3 mlrd teńge (2022 jyly — 6,6 mlrd teńge; 2023 jyly — 28,8 mlrd teńge; 2024 jyly — 8,9 mlrd teńge), sonyń ishinde Semeı qalasyndaǵy 7 ákimshilik ǵımaratty kúrdeli jóndeýge (11 mlrd teńge) qarajat bólindi.

Osymen qatar respýblıkalyq bıýdjetti kezekti naqtylaý kezinde (shamamen bıylǵy maýsym aıynda) Jańasemeı jáne Maqanshy aýdandarynda ákimshilik ǵımarattardyń qurylysyna qarajat bólý máselesi qaralady. Bul rette qazirgi ýaqytta atalǵan aýdandardyń barlyq ákimshilik organy ýaqytsha jalǵa alynǵan ofıstik úı-jaılarda ornalasqanyn aıta ketken jón, — dep jazady Oljas Bektenov.

Sondaı-aq, Premer-mınıstr jaýabynda bıyl óńirdegi oblystyq jáne aýdandyq joldardy jóndeýge respýblıkalyq bıýdjetten 9,9 mlrd teńge bólý josparlanǵany aıtylǵan.

— Búgingi tańda oblystyq mańyzy bar «Aıagóz — Qaraýyl» avtomobıl jolynyń jalpy uzyndyǵy 218 shaqyrym bolady. Bıyl avtomobıl jolynyń 2 ýchaskesinde (84-99 km jáne 97-117 km) jalpy somasy 2,5 mlrd teńgege ortasha jóndeý júrgizý josparlanyp otyr, — delingen jaýapta.

Resmı jaýaptan Abaı oblysyna Turǵyn úı qurylysyn damytý baǵdarlamasy aıasynda bıyl 149 jaldamaly páter satyp alýǵa 2,1 mlrd teńge qarastyrylǵanyn uǵýǵa bolady.

— Oblys ákimdigi bıyl kredıttik turǵyn úı aıasynda 113 myń sharshy metrdi (1870 páter) 2 salýǵa jáne satyp alýǵa 8,8 mlrd teńgege ótinim bergen. Búgingi kúni 2,8 mlrd teńge maquldandy, — deıdi Oljas Bektenov.

Sondaı-aq, búgin Abaı oblysynda túrmede jazasyn ótep jatqan adamnyń qaza bolýyna qatysty qylmystyq is qozǵalǵany málim boldy.