Abaı oblysy ákiminiń orynbasary Dımıtrıı Garıkov qyzmetinen ketti

SEMEI. KAZINFORM – Abaı oblysy ákiminiń orynbasary Dımıtrıı Garıkov óz erkimen jumystan shyqty.  

Onyń aıtýynsha, jumystan ketý týraly sheshimdi ózi qabyldaǵan.

— Oblys ákiminiń orynbasary qyzmetinen ketý týraly mańyzdy jáne sanaly sheshim qabyldadym. Bul qyzmette jumys isteý men úshin asa úlken jaýapkershilik jáne abyroıly is boldy, — dep jazdy Dımıtrıı Garıkov áleýmettik jelidegi jeke paraqshasynda.

Dımıtrıı Aleksandrovıch Garıkov 1975 jyly Shyǵys Qazaqstan oblysy Borodýlıha aýdany Borodýlıha aýylynda dúnıege kelgen. Bilimi — joǵary. 1998 jyly Semeı qurylys tehnıkýmyn, 2000 jyly D. Serikbaev atyndyǵy Shyǵys Qazaqstan tehnıkalyq ýnıversıtetin bitirgen.

Borodýlıha aýdany Borodýlıha aýylynyń «Turmys qyzmeti» AQ-da ot jaǵýshy, Borodýlıha MAZS-da operator boldy.

Keıin Borodýlıha aýdany ákimi apparatynyń bas mamany; Borodýlıha aýdany Dmıtrıevka aýylynda janar-jaǵarmaı quıý beketiniń meńgerýshisi; «Kommýnaldyq sharýashylyq» memlekettik kommýnaldyq kópsalaly kásipornynyń bastyǵy; Shyǵys Qazaqstan oblysy Borodýlıha aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy; «ShQO Borodýlıha aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi» MM basshysy; Shyǵys Qazaqstan oblysy Borodýlıha aýdany ákiminiń orynbasary; «ShQO jolaýshylar kóligi jáne avtomobıl joldary basqarmasy» MM basshysy qyzmetterin atqardy.

Budan bólek, Kýrchatov qalasynyń ákimi, Shyǵys Qazaqstan oblysy ákiminiń orynbasary, ShQO memlekettik sáýlet-qurylys baqylaýy basqarmasynyń basshysy, Semeı qalasy ákiminiń orynbasary laýazymynda boldy.

Eske salsaq, 14 sáýirde Abaı oblysyndaǵy Prırechnoe aýylynda kúnbaǵys qabyǵynan shyqqan órt jekemenshik sektorǵa jaıylǵan. 

Órtke baılanysty jedel shtab quryldy. 
Dala órtine baılanysty tutas bir aýyldy kóshirýge týra keldi. 
Al keshe Premer-mınıstr Oljas Bektenov Pavlodar jáne Abaı oblysynda bolǵan tabıǵı órt kezinde memlekettik organdardyń is-qımyl algorıtmi saqtalmaǵanyn synǵa alǵan bolatyn.