Abaı oblysy ákimdiginde jıhaz satyp alý konkýrsy toqtatyldy
SEMEI. KAZINFORM - Sońǵy kúnderi Abaı oblysynda ákimdik pen oǵan qarasty basqarmalar úshin keńse jıhazdaryn satyp alý máselesi BAQ pen áleýmettik jelide keńinen talqylanýda. Osyǵan oraı, biz oblys ákimdigine saýal joldap, jaǵdaıdyń mán-jaıyn naqtylaýǵa tyrystyq.
Abaı oblysy ákiminiń birinshi orynbasary Erbol Sadyr atalǵan memlekettik satyp alý protsesi boıynsha jaǵdaıdyń qalaı qalyptasqanyn túsindirip berdi.
Suraq:
– Erbol Ábilhaıyruly, sońǵy kúnderi Abaı oblysy ákimdigi men oǵan qarasty basqarmalarǵa keńse jıhazdaryn satyp alý boıynsha konkýrs týraly biraz BAQ-ta aıtyldy. Jalpy, oblys ákimdigi buǵan deıin keńse jıhazymen qalaı qamtamasyz etilgen edi?
Jaýap:
– Keńse jıhazdaryn satyp alý boıynsha konkýrstyq rásimder jarııalanǵanymen, Abaı oblysy ákiminiń sheshimimen toqtatylǵanyn habarlaımyn.
Al suraǵyńyzǵa keler bolsam, Abaı oblysy qurylǵan 2022 jyldan beri oblys ákiminiń apparaty men oǵan baǵynysty 23 basqarma úshin jıhaz satyp alýǵa qatysty memlekettik satyp alý rásimderi júrgizilgen joq. Qazirgi tańda 639 qyzmetker Semeı qalasy ákimdiginen esepten shyǵarylǵan, tozyǵy jetken jıhazdardy qoldanyp keledi. Tipti qyzmetkerleri óz úıinen ákelgen jıhazdardy paıdalanyp júrgen basqarmalar da bar.
Jalpy, qarapaıym qyzmetkerlerge yńǵaısyzdyq týdyrǵan osy ózekti máseleni sheshý úshin 2024 jyly memlekettik satyp alý rásimderi bastalǵan bolatyn. Anyǵyn aıtqanda, byltyrdan beri kúni búginge deıin 7 ret jarııalandy. Alaıda, tapsyrys oryndaýshylar tarapynan qujattardyń durys bolmaýy sebebimen únemi konkýrs shegerilip keledi.
Keńse jıhazyna qajettilik QR Qarjy mınıstriniń 2025 jylǵy 28 sáýirdegi №201 buıryǵyna sáıkes qalyptastyryldy. Bul qujat memlekettik organdardy keńse jıhazymen, tehnıkalyq jabdyqtarmen, kólik quraldarymen jáne basqa da materıaldyq resýrstarmen qamtamasyz etýdiń zattaı normalaryn belgileıdi.
Suraq:
– Jıhaz satyp alý protsesi qaıta qolǵa alyna ma?
Jaýap:
– Joq. Jańa aıtqanymdaı oblys ákiminiń sheshimimen konkýrs toqtatyldy.