Abaı mýzeıi ekspozıtsııasyn jańǵyrtýǵa 250 mln teńge bólinbek

ÓSKEMEN. QazAqparat. «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń dırektory Jandos Áýbákir Abaı mýzeıi ekspozıtsııasyn jańǵyrtýǵa 250 mln teńge bólinetinin aıtty, dep habarlaıdy Qazaqparat.

Qazirgi ýaqytta qoryq-mýzeıinde hákimniń 175 jyldyǵyna baılanysty qyzý ázirlik jumystary júrgizilýde. Mýzeı keshenin qaıta jańǵyrtý, aǵymdaǵy jáne kúrdeli qurylys jumystaryn júrgizý, abattandyrý, jaryqtandyrý sharalary qolǵa alynǵan.

«Bas mýzeıdegi jóndeý jumystaryn júrgizý úshin 30 mln teńge jáne Abaı mýzeıi ekspozıtsııasyn jańǵyrtýǵa 250 mln teńge bólinbek. Uly aqynnyń mereıtoıynda kóptiń nazary onyń týyp-ósken jerine aýatyny anyq. Sol úshin mýzeı mamandaryna artylar júk jeńil emes», - deıdi Jandos Áýbákir.

Esterińizge sala ketsek, osyǵan deıin uly aqynnyń kindik qany tamǵan jer - Syrt Qasqabulaqtyń abattandyrylatyny habarlanǵan bolatyn.