Abaı murajaıynyń jetekshisi IKOM medalimen marapattaldy
ASTANA. QazAqparat - Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-murajaıynyń dırektory Bolat Júnisbekov mýzeı salasyn damytýǵa qosqan úlesi úshin Halyqaralyq mýzeıler odaǵynyń («IKOM») tósbelgisimen marapattaldy.
QR Mádenıet jáne sport mınıstrliginiń baspasóz qyzmeti habarlaýynsha, Bolat Júnisbekov buǵan deıin jıyrma jylǵa jýyq Almaty qalasynda ishki saıasat pen mádenıet salalaryna jetekshilik etip, bes jyldan astam ýaqyt Astana qalasynda «ALJIR» memorıaldyq murajaı kesheni men «Astana» sýret galereıasynda dırektory qyzmetin atqarǵan.
Biraq, Bolat Júnisbekulynyń ózi: «Bul medal, eń aldymen, Uly aqyn murajaıy ujymynyń eńbegine berilgen laıyqty baǵa», - dep sanaıdy. Uly Abaı (IbraHım) Qunanbaıulynyń ómiri men qaıtalanbas shyǵarmashylyǵynyń kýásindeı asyl murany kózdiń qarashyǵyndaı saqtaýdan asqan abyroı joq. Soǵan oraı, hákim Abaıdyń endi bes jyldan keıin bolatyn torqaly toıyna daıyndyqty qolǵa alǵan murajaı ujymy óz aldarynda turǵan zor jaýapkershilik júgin tereń sezinedi.
B.Júnisbekovke «IKOM» medalin, onyń Qazaqstandaǵy ulttyq komıtettiń atynan respýblıkamyzdyń Ulttyq akademııalyq kitaphanasynyń dırektory Úmitqan Muńalbaeva tapsyrdy.
Ol Semeıge kelgen issaparynda Abaıdyń Jıdebaıdaǵy, Muhtar Áýezovtiń Bórilidegi murajaı-úılerin aralap kórdi jáne uly aqynnyń ómirine qatysty tarıhı oryndarmen tanysyp, murajaı shyraqshylarynyń qyzmetine shyn júrekten tilektestigin «taǵy bir oralyp kelgenshe asyǵamyn» degen jyly lebizimen bildirdi.
