Abaı murasy Barselonada jurtshylyq nazaryna usynyldy

BARSELONA. QazAqparat - Ispanııadaǵy Qazaqstan Elshiliginiń uıymdastyrýymen Abaıdyń 175 jyldyǵyna arnalǵan is-sharalar estafetasyn Katalonııa óńiriniń bas qalasy qabyldady, dep habarlaıdy QazAqparat QR SІM baspasóz qyzmetine silteme jasap.

Qazaqstannyń Barselonadaǵy konsýldyǵynda ótken is-sharany konsýl Rınat Dúısembaev pen Barselona kınofestıvaliniń jetekshisi, Casa Asia (Azııa úıi) mádenıeti men ekspozıtsııalarynyń dırektory, jazýshy jáne kınotanýshy Menene Gras ashty.

Ispandyq qonaqtar, qazaqstandyq stýdentter, qazaqstandyq balalardy asyrap alǵan otbasylar jáne basqa da kórermenderge Abaıdyń shyǵarmashylyǵy men elimizdiń mádenı jáne rýhanı ómirin damytýdaǵy róli týraly aqparat berildi. Qonaqtarǵa ıspan tiline jaryq kórgen Abaıdyń «Qara sózderi» men Prezıdent Qasym-Jomart Toqaevtyń «Abaı jáne HHІ ǵasyrdaǵy Qazaqstan» broshıýrasy usynyldy.

Іs-shara aıasynda ótken shaǵyn kontsert baǵdarlamasynda Abaıdyń «Kózimniń qarasy» men «Aıttym sálem, Qalamqas», sondaı-aq basqa da tanymal qazaq ánderi aıtyldy.

Professor Menene Gras ıspan kórermenderiniń Abaı shyǵarmashylyǵyna (jaqynda Ispanııada onyń beınesimen poshta markasy bastyryldy) jáne jalpy qazaq mádenıetine, onyń ishinde Casa Asia men Qazaqstan konsýldyǵy qoldap otyrǵan Barselonada jyl saıynǵy Barselonalyq Azııa kınofestıvaline sátti qatysatyn zamanaýı qazaqstandyq fılmderge degen úlken qyzyǵýshylyǵyn atap ótti.