Abaı mereıtoıy: El óńirleri Semeı qalasyn abattandyryp jatyr

SEMEI. QazAqparat – Semeı qalasynda Abaıdyń 175 jyldyǵyna oraı Shymkent pen Jambyl oblysynyń, Atyraý, Aqtóbe jáne Pavlodar qalasynan kelgen mamandar kópqabatty úılerdiń aýlalaryn abattandyrýda, dep habarlaıdy QazAqparat tilshisi.

Qalalyq Aqparat ortalyǵynyń málimetinshe, búgingi tańda abattandyrý jumystary aıaqtalýǵa jaqyn. Joba boıynsha aýlalarda vorkaýt, fýtbol alańdary jasalyp, jergilikti turǵyndarǵa demalys oryndary salynǵan. Sondaı-aq aýlalarǵa asfalt tóselip, jaryqtandyrý jumystary da qolǵa alynýda.

«Jambyl oblysy uly aqynnyń mereıtoıyna oraı Dokýchaev jáne Zasıadko kósheleriniń aýlalaryn abattandyrýmen aınalysyp jatyr. Balalar jáne sport alańdary boı kóterip, asfalt jamylǵysy jańartyldy. Budan bólek, jaryq baǵanalary ornatylyp, fýtbol alańy jabdyqtaldy. Endi tek fýtbol alańyn qorshap, asfalttaýdy aıaqtaý ǵana qaldy», - deıdi ýchaske bastyǵy Baýyrjan Súleımenov.

Bul aýlalardaǵy jumystar eki aı buryn bastalǵan bolatyn. Joba boıynsha abattandyrýǵa 3 jarym aı merzim berilgen. Alaıda búginde jumystardyń 80 paıyzy aıaqtaldy. Sondyqtan osy aıdyń aıaǵyna deıin aýlalar tolyqtaı abattandyrylmaq.