Abaı men Ulytaý oblystaryna respýblıkalyq bıýdjetten qosymsha transfertter bólý kerek — Májilis depýtaty
ASTANA. KAZINFORM — Abaı men Ulytaý oblystaryna respýblıkalyq bıýdjetten qosymsha transfertter bólý kerek. Búgin Májilistiń jalpy otyrysynda Úkimet basshysynyń atyna saýal joldaǵan depýtat Jıgýlı Daırabaev osyndaı usynys jasady.
— Abaı jáne Ulytaý oblystaryna 10 kúndik jumys saparymen baryp, shalǵaı aýyldardy aralap, eldiń turmys-tirshiligimen tanystym. Kezdesýler barysynda kóterilgen máselelerdiń basym bóligi eki óńirge de ortaq, ári júıeli sıpatqa ıe. Bul eń aldymen mamandardyń tapshylyǵy, jastardyń aýyldan kóshýi, veterınarlyq sala deńgeıiniń tómendigi, aýyz sý, kólik, jol, jalpy aýyldyq ınfraqurylymnyń tozýy sııaqty suraqtardan kórinis taýyp otyr. Atalǵan máselelerdi jergilikti bıýdjetterdiń qarajatymen sheshý múmkin emes. Erekshe alańdatatyn jaǵdaı — fermerler úshin nesıeleý sharttarynyń qatańdyǵy, kepil talaptarynyń aýyrlyǵy, qarjynyń kesh bólinýi jumystardyń ýaqytynda júrgizilýine múmkindik bermeı otyr, — dedi Jıgýlı Daırabaev.
Osyǵan baılanysty Májilis depýtaty Abaı jáne Ulytaý oblystaryn damytýdy jedeldetý maqsatynda Úkimet tarapynan birqatar máseleni qarastyrýdy surady.
— Birinshi, atalǵan oblystarǵa arnalǵan arnaıy keshendi áleýmettik-ekonomıkalyq damý baǵdarlamasyn qaıta qarap, qarajatty kóbeıtý múmkindigin zerdelep, respýblıkalyq bıýdjetten qosymsha transfertter bólý kerek. Aýyl sharýashylyǵy ónimderin qaıta óńdeıtin kásiporyndarǵa arnalǵan arnaıy qarjylyq qoldaý sharalaryn engizý máselesin qarastyrý jáne ınvestıtsııa tartýǵa baǵyttalǵan erekshe jeńildikter men yntalandyrý tetikterin engizý qajet, — dedi ol.
Onyń aıtýynsha, ekinshiden, iri qara maldyń buqashyqtaryn eksporttaýǵa qoıylǵan shekteýdi alyp tastaý nemese bordaqylaý alańyndaryna et óńdeýshi kásiporyndarmen kelisim arqyly iri qara mal etin eksporttaýǵa kvota arqyly múmkindik bergen jón.
— Úshinshi, sý únemdeý tehnologııalaryn engizýge baǵyttalǵan shyǵyndardyń bir bóligin óteý boıynsha sýbsıdııalaý qaǵıdalaryna ár oblystyń bıýdjet múmkindikteri eskerilip, sý únemdeý tehnologııalaryn engizý kezinde jumsalǵan shyǵyndar qaǵıdasyna respýblıkadan 80 paıyz ótemaqy berý qarastyrylsa. Tórtinshi, jalpy aýyl sharýashylyǵymen aılanysatyn fermerlerdiń, aýyl turǵyndarynyń jaǵdaıyn jaqsartý úshin naqty áleýmettik-turmystyq qoldaý sharalaryn kúsheıtý qajet. Jańadan qurylǵan oblystarǵa erekshe nazar aýdarý qajet dep sanaımyn. Bul — el birligin nyǵaıtýǵa, aýyldardyń áleýetin arttyrýǵa jáne halyqtyń ómir sapasyn jaqsartýǵa tikeleı yqpal etetin mańyzdy másele, — dedi ol.
Buǵan deıin Májilis depýtaty agrarlyq mamandyq stýdentteriniń shákirtaqysyn kóterýdi usynǵan bolatyn.