Abaı men Shyǵys Qazaqstan oblystarynda birneshe jol jabyldy

ÓSKEMEN. KAZINFORM — Abaı men Shyǵys Qazaqstan oblystarynda birneshe jolda kólik qozǵalysyna tyıym salyndy.

«KAJservıs» JShS málimetine súıensek, aýa raıynyń qolaısyzdyǵyna, naqty aıtqanda qalyń qar jaýyp, boran soǵyp, joldyń durys kórinbeýinen birneshe jol jabyldy.

— «Óskemen-Rıdder-RF shekarasy» tasjolynyń 15-105 shaqyrymynda (Beloýsovka kenti men Rıdder qalasynyń aralyǵy), «Almaty-Taldyqorǵan-Óskemen-Shemonaıha-RF shekarasy» tasjolynyń 1104-1191, 1194-1212, 1013-1062 shaqyrymdarynda, «Óskemen-Semeı» tasjolynyń 10-103 shaqyrymynda (Gerasımovka aýyly men Abaı oblysynyń shekarasy) kóliktiń barlyq túriniń qozǵalysyna tyıym salyndy, — delingen aqparatta.

Sondaı-aq «Taskesken-Baqty-QHR shekarasy» jolynyń 0-187 shaqyrymy (Almaty-Óskemen avtojolynan Taskesken aýylyna burylystan QHR shekarasyna deıingi aýmaq) jabyldy.

Eske salsaq, osyǵan deıin Astana qalalyq TJD kúnniń kúrt buzylýyna baılanysty turǵyndarǵa eskertý jasaǵany habarlanǵan.