Abaı men aǵylshyn: Mektep oqýshysy qos tildi kitap jazyp shyqty
ASTANA. KAZINFORM — Mektep oqýshysy eki tildi kitap jazyp shyǵardy. Abaıdyń danalyq sózderin negizge ala otyryp jazylǵan planer-kúndelik aǵylshyn tilin úırenýge de kómektesedi.
Abay Shyn kitabynyń avtory Álıhan Rahymbaı «Búgin LIVE» baǵdarlamasyna qonaq bolyp, týyndysyn tanystyrdy.
— Qazirgi tańda kóptegen jastar damýǵa tyrysady. Barlyǵy jetistikke jetkisi keledi. Bul kúndelikte til men Abaıdyń qundylyqtary bar. Men bilim alatyn Abaı Qunanbaev atyndaǵy № 87 mektepte abaıtanýshy, belgili ustaz Almahan Muhametqalıqyzy jumys isteıdi. Onyń aıtýynsha, qazaqty oıatatyn 3 qana nárse bar. Biri — Abaı, ekinshisi — aıtys, úshinshisi — at jarys. Bul úsheýine de meniń kúshim jetpeıdi. Biraq men Abaı men dál osyndaı elementter arqyly jastardyń rýhyn oıata alamyn. Bul kúndelikte adamdar ózderiniń kúnderin josparlaýmen qatar, kúndelikti aǵylshyn tilinde 5 sóz jattap otyrady. Jáne de Abaıdyń 1 sózimen jiger-qaırat alyp, kúnin berekeli, ónimdi ótkize alady, — deıdi jas daryn.
Álıhan Rahymbaı ózi jazǵan kitaptyń erekshelikterin aıtyp berdi.
— Abaıdyń kez kelgen sózi óte rýhty. Biraq men onyń ishinen de keıbir sózderin súzip aldym. Ol sózder qazaq jastaryn oıata alatyn sózder. Olardy tańdaýǵa maǵan Almahan Muhametqalıqyzy kómektesti. Kúndelik 6 aıǵa negizdelgen. 6 aıda 26 apta bar. 26 aptaǵa 26 bólek taqyryp berilgen. Bul kúndelikti oqýshylar, jastar paıdalanatyn bolsa, olar 6 aıda óz ómirin 180 gradýsqa ózgertip, oǵan qosa aǵylshyn tilin úırenip, Abaıdyń qundylyǵymen tolyq adam bolyp qalyptasady, — deıdi Álıhan.
Oqýshy jazyp shyǵarǵan kitap tipti laýazymdy tulǵalardyń da nazaryna ilikken kórinedi.
— Jaqyn ýaqytta men Ashat Aımaǵambetovpen kezdestim. Ol kisimen osy kúndelik jaıynda áńgimelestik. Ol kisi meni Edil Sabyrulymen kezdestirdi. Sol kezde vıtse-mınıstr bul jobany qoldap, osy kúndelikti shyǵarý jumystaryn sońyna deıin jetkizip, bilim salasy boıynsha mınıstrliktiń mórin basýǵa óz kómegin beretinin aıtty, — deıdi avtor.
Eske sala keteıik, buǵan deıin almatylyq oqýshylardyń NASA baıqaýynda jeńiske jetkenin habarlaǵan edik.