Abaı mektebi jańa ǵımaratqa kóshedi: qazirgi mektep pen ınternat ne bolady
ALMATY. KAZINFORM – Abaı atyndaǵy mektep-ınternat jańa ǵımaratqa aýysqannan keıin eski ǵımarattyń taǵdyry qandaı bolmaq? Oqýshylardy qabyldaý tártibi men ustazdar quramy ózgere me? Kazinform tilshisi anyqtap kórdi.
Byltyr qarasha aıynda Prezıdent tapsyrmasymen Abaı atyndaǵy respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternatynyń jańa ǵımaratynyń qazyǵy qaǵyldy.
Al bıyl qańtar jańa mekteptiń qurylysy bastaldy. Abaı atyndaǵy mektep-ınternat jańa ǵımaratqa kóshkennen keıin Abaı ulttyq mektebi mártebesin almaq.
Osy oraıda, Kazinform tilshisi oqý ordasynyń qazirgi ǵımaraty men qasyndaǵy eki jataqhananyń bolashaqta qandaı maqsatta qoldanylatynyn Oqý-aǵartý mınıstrliginen surady.
Vedomstvonyń jaýabyna sáıkes, Abaı atyndaǵy respýblıkalyq mektep-ınternattyń jańa ǵımaraty Bostandyq aýdanynda qarqyndy túrde salynyp jatyr. Qazirgi ǵımaraty Medeý aýdanynda Mıtın, 6 mekenjaıy boıynsha ornalasqan. Oqý ordasynyń ujymy ǵımaratynyń qurylysy men ishki árleý jumystary tolyq aıaqtalǵannan keıin jańa nysanǵa tolyǵymen kóshedi.
- Qazirgi mektep-ınternattyń ǵımaraty Qazaqstan Respýblıkasy Oqý-aǵartý mınıstrliginiń qaramaǵynda qala beredi. Atalǵan nysanda aldaǵy ýaqytta pedagogıka jáne psıhologııa baǵytynda pedagogter men bilim alýshylardyń kásibı ál-aýqatyn arttyrýǵa jáne qoldaý kórsetýge arnalǵan jumystardy uıymdastyrý josparlanyp otyr, - delingen mınıstrlik jaýabynda.
Sonymen qatar vedomstvo mektep-ınternatynyń jańa mıssııasy men damý tujyrymdamasynyń qabyldanýyna baılanysty aldaǵy kezeńde kadrlyq quramǵa ózgeris enýi múmkin ekenin atap ótti.
Odan bólek qazirgi ýaqytta mektep-ınternatqa 7-synyp oqýshylaryn qabyldaý máselesin mınıstrlik qarastyryp jatyr. Osy ýaqytqa deıin mektep oqýshylardy 8-synyptan bastap emtıhan negizinde qabyldap keldi.
Eske salaıyq, Almatyda Abaı atyndaǵy respýblıkalyq mektep-ınternatynyń qurylysy qashan aıaqtalatynyn jazǵanbyz.