Abaı kúnine oraı Qazaqstanda 350-den astam is-shara ótedi

Abaı murasy álemdik deńgeıde keńinen tanylǵan. 1995 jyly aqynnyń 150 jyldyǵy ıÝNESKO kóleminde atalyp ótti. Onyń ádebı, fılosofııalyq jáne mýzykalyq murasy, bilim, eńbek, ádilet jáne adamgershilik týraly oı-tujyrymdary búgin de óz mańyzyn joǵaltqan joq.

– Abaı kúnine oraı respýblıka boıynsha 350-den astam mádenı, ǵylymı-tanymdyq, bilim berý jáne sporttyq is-shara uıymdastyrylady. Respýblıkalyq baǵdarlamadaǵy negizgi is-sharalar Mádenıet jáne aqparat mınıstrligine qarasty uıymdarda ótedi, – delingen vedomstvo habarlamasynda.

7 tamyzda Ulttyq akademııalyq kitaphanada oıshyl murasyn zertteýge jáne keńinen tanytýǵa arnalǵan «Abaı álemi – máńgilik mura» halyqaralyq ǵylymı-praktıkalyq konferentsııasy ótti.

Almatydaǵy Qazaqstan Respýblıkasynyń Ulttyq kitaphanasynda «Uly halyqtyń – Uly Abaıy» zııatkerlik saıysy uıymdastyryldy. Ulttyq mýzeıde «Abaı sózi – urpaqqa amanat» mýzeı sabaǵy jáne aqynnyń ómiri men shyǵarmashylyǵyn dáripteıtin «Abaı muralary – kóneniń kózi» taqyryptyq ekskýrsııasy ótti.

Semeıdegi Abaıdyń memlekettik mýzeı-qoryǵy da ataýly kúnge arnaıy baǵdarlama ázirledi. 10 tamyzda munda «Abaı beıneleý ónerinde» jáne «Abaıdyń ómir derekteri…» kórmeleri ashylady. Sondaı-aq ádebı kvest pen Abaı ánderiniń festıvali uıymdastyrylyp, «Uly aqyn Abaı uldarymen» eskertkishine gúl shoqtary qoıylady.

Ábilhan Qasteev atyndaǵy Qazaqstan Respýblıkasynyń Ulttyq óner mýzeıi, Qazaqstan Respýblıkasynyń Ulttyq ortalyq mýzeıi, «Berel», «Tańbaly» mýzeı-qoryqtary jáne basqa da mádenıet mekemeleri taqyryptyq jobalaryn usynady.

Teatrlar men kıno uıymdary mýzykalyq jobalar men beınematerıaldardy tanystyryp, Abaı shyǵarmalary jelisinde sahnalanǵan qoıylymdardan úzindiler kórsetedi. 10 tamyzda Almatyda Mádenıet jáne aqparat mınıstrliginiń tapsyrysymen jáne Ulttyq kınony qoldaý memlekettik ortalyǵynyń qoldaýymen túsirilgen «Alǵashqy kitap» derekti fılminiń resmı tusaýkeseri ótedi.

– Abaı kúnine arnalǵan is-sharalar Beıjińde de uıymdastyrylady. 10 tamyzda Qazaqstannyń mádenı ortalyǵy «Tszıntaı» mýzeıimen birlesip «Abaı – Uly tulǵa» dóńgelek ústelin ótkizedi. Jıynda oıshyldyń ádebı-fılosofııalyq murasy men onyń ıdeıalaryn shetelde keńinen tanytý máseleleri sóz bolady, – dep habarlady mınıstrlik.

Astanada da aýqymdy baǵdarlama usynylady. 8-10 tamyz aralyǵynda Qalamgerler alleıasynda «Óleń sózdiń patshasy…» poezııa keshi uıymdastyrylyp, qala saıabaqtarynda ótetin «Ándi súıseń, menshe súı» is-sharasynda Abaıdyń ánderi shyrqalady.

Elimizdiń ár óńirinen kelgen jas qalamgerler «Sóz óneri. Jasampaz jas qalam» respýblıkalyq forýmynda bas qosady. Budan bólek, ádebı-sazdy keshter, dárister, vıktorınalar men kitap kórmeleri ótedi.

Almatyda ádebı jáne aǵartýshylyq baǵyttaǵy is-sharalar jalǵasady. Shymkentte poezııalyq jáne tanymdyq baǵdarlamalar uıymdastyrylyp, «Hakim Abaı» mýzeıinde ashyq esik kúni, taqyryptyq kórme men ekskýrsııalar ótedi.

Óńirlerde aıtystar men kontsertter, teatr qoıylymdary, «Abaı oqýlary» baıqaýlary, poezııa keshteri, kórmeler jáne túrli tanymdyq jobalar uıymdastyrylady.

Abaı oblysynda 8-9 tamyz kúnderi «Abai Joly – 100 miles» respýblıkalyq ýltramarafony ótkizilse, 10 tamyzda «Adamzattyń Abaıy» aqyndar aıtysy ótedi. Merekelik is-sharalar oblys ortalyqtarymen qatar qalalar, aýdandar men aýyldardy da qamtıdy.

10 tamyzda Astana, Almaty, Shymkent qalalary men oblys ortalyqtarynda Abaı Qunanbaıulynyń eskertkishterine gúl shoqtary qoıylady. Arnaıy rásimge zııaly qaýym ókilderi, mádenıet qaıratkerleri, jastar jáne jurtshylyq qatysady.