Abaı kúnine arnalǵan is-sharalarǵa myńnan asa áskerı qyzmetshi qatysty
ASTANA. KAZINFORM — Búgin Qazaqstan halqy uly oıshyl, aǵartýshy, aqyn Abaı Qunanbaıulynyń murasyn ulyqtap jatyr, dep habarlaıdy Qorǵanys mınıstrliginiń baspasóz qyzmeti.
Mınıstrlik atap ótkendeı, uly aqynnyń bilim men eńbek, ar men ádilet, el men jer týraly taǵylymdy oılary áskerı-patrıottyq tárbıe júıesinde de keńinen kórinis taýyp keledi.
Bul kúnderi Qarýly kúshterdiń barlyq túrleri men ásker tekteri, óńirlik qolbasshylyqtar, áskerı bólimder men mekemelerden myńnan asa áskerı qyzmetshi uly oıshyldyń ómiri men shyǵarmashylyǵyna arnalǵan mádenı-aǵartýshylyq jáne tárbıelik is-sharalarǵa qatysty.
Qarýly kúshterde respýblıkalyq chellendj uıymdastyrylyp, áskerı qyzmetshiler Abaıdyń óleńderi men «Qara sózderinen» úzindiler oqyp, beınerolıkter túsirdi.
Áskerı bólimder men áskerı oqý oryndarynda ádebı oqýlar, mánerlep oqý baıqaýlary, taqyryptyq kezdesýler men pikirtalastar, suraq-jaýaptar jáne kitap kórmeleri ótti.
Jas jaýyngerler rýhanı-adamgershilik pen áskerı-patrıottyq tárbıeniń mańyzdy bóligine aınalǵan Abaıdyń baı murasyna erekshe nazar aýdardy.
Abaı kúni qarsańynda Abaı garnızonyna qarasty 32388 áskerı bóliminiń baza serjanty, 2-synypty serjant Álı Nurahmetov qyzdarymen birge qaladaǵy kórikti oryndardyń birinde serýendep, olar uly aqyn Abaı Qunanbaıulynyń óleńderin jatqa oqydy. Bul – óskeleń urpaqtyń ulttyq rýhanııatty dáriptep, Abaı murasyn nasıhattaýdyń jarqyn kórinisi. Otbasylyq qundylyqtar men ulttyq tárbıeni ushtastyrǵan bastama Abaıdyń rýhanı murasyn keıingi býynǵa jetkizýdiń mańyzyn taǵy bir aıshyqtady.
— Abaı murasyn qurmettep, keńinen nasıhattaý — qoǵamnyń rýhanı birligin nyǵaıtyp, ar-namysty bıik qoıatyn, bilimge umtylatyn, jaýapkershilikti sezinetin jáne Otanǵa adal qyzmet etetin jas urpaqty tárbıeleýge yqpal etedi, — delingen vedomstvo habarlamasynda.
Osyǵan deıin Semeıde Abaı kúnine oraı 35 metrlik Rámizder alańy ashylǵanyn jazǵan edik.
