Abaı kúnine arnalǵan is-sharaǵa 50 myńnan astam adam qatysty

Mádenıet jáne aqparat mınıstrligine qarasty uıymdarda Abaı murasyn dáripteýge aıryqsha mán berildi. Semeıdegi «Jıdebaı-Bórili» mýzeı-qoryǵynda aqyn ómir súrgen kezeńge qatysty qoljazbalar, muraǵat qujattary men estelikter kópshilik nazaryna usynyldy.

Sondaı-aq beıneleý ónerindegi Abaı tulǵasyna arnalǵan kórme uıymdastyryldy. Ádebı kvest pen Abaı ánderiniń festıvali de ótip, mýzeı qoryndaǵy mura jurtshylyqqa túrli tanymdyq formatta tanystyryldy.

Ulttyq mýzeıde oıshyldyń ómiri men taǵylymdy oılaryna arnalǵan taqyryptyq ekskýrsııa men mýzeı sabaǵy ótti. Ábilhan Qasteev atyndaǵy Qazaqstan Respýblıkasynyń Ulttyq óner mýzeıinde balalar qazaqstandyq sýretshilerdiń týyndylary arqyly Abaı tulǵasymen tanysty.

Al «Otyrar» mýzeı-qoryǵynda aqynnyń shyǵarmashylyq murasyna arnalǵan kitap kórmesi uıymdastyryldy.

Almatydaǵy «Abaı álemi» mýzykalyq-poezııalyq keshi aýqymdy is-sharalardyń birine aınalyp, 20 myńnan astam adamdy qamtydy. Kesh aıasynda «Alǵashqy kitap» derekti fılminiń premerasy ótti. Fılmde Abaı shyǵarmalarynyń 1909 jyly jaryq kórgen tuńǵysh jınaǵynyń tarıhy baıandalady.

Abaı kúnine arnalǵan baǵdarlama Beıjińde de jalǵasty. Qazaqstannyń mádenı ortalyǵynda elimizdiń QHR-daǵy Elshiligi jáne «Tszıntaı» mýzeıiniń qatysýymen «Abaı – Uly tulǵa» dóńgelek ústeli ótti. Jıynda qytaılyq ǵalymdar, jazýshylar men aýdarmashylardyń Abaı shyǵarmalaryn zertteý, aýdarý jáne nasıhattaý baǵytyndaǵy kópjyldyq eńbegi keńinen sóz boldy.

Mınıstrlik málimetinshe, óńirlerde de aqyn murasyn dáripteıtin túrli is-sharalar ótkizildi. Abaı oblysynda «Abai Joly – 100 miles» ýltramarafony men «Adamzattyń Abaıy» respýblıkalyq aıtysy ótti.

Astanadaǵy «Sóz óneri. Jasampaz jas qalam» forýmyna jas qalamgerler qatysty.

Abaı kúnine oraı elordalyq saıabaqta turǵyndardyń dinı saýattylyǵyn arttyrýǵa baǵyttalǵan aktsııa ótkenin jazǵan edik.