Abaı kúnine oraı Semeıde Jerlester forýmy ótedi

SEMEI. QazAqparat – Semeı qalasynda Abaı kúnine oraı Jerlester forýmy ótedi, dep habarlaıdy QazAqparat tilshisi.

Óńir ákimdiginiń málimetine súıensek, Abaı oblysynyń ákimi Nurlan Uranhaev jergilikti kásipkerler qaýymymen kezdesti. Ol óz sózinde Semeıden shyqqan kásipkerlermen turaqty túrde kezdesip turý ıdeıasyn jetkizdi.

«10 tamyzda Abaıdyń týǵan kúnin atap ótemiz. Bul uly aqynnyń atymen atalatyn oblystyń qurylǵannan keıin hakimge kórsetetin alǵashqy qurmeti bolmaq. Sondyqtan bul mereke este qalarlyqtaı ótkenin qalaımyz. Osy rette, Semeı óńiriniń týmalarynyń basy qosylatyn Jerlester forýmyn ótkizýdi usynamyz», - dedi Nurlan Uranhaev.

Aımaq basshysy onda túrli salada jetistikterge jetken, týǵan qalasyna degen súıispenshiligi men jańa óńirdiń damýyna atsalysýǵa nıeti bar iri bıznes ókilderi shaqyrylatynyn atap ótti. Qazirgi ýaqytta kezdesýge qatysýshylardyń tizimi jasalyp jatyr. Kásipkerler shaqyrylatyn adamdardy ózderi usynyp, aldaǵy forýmdy uıymdastyrýǵa belsene qatysa alady.