Abaı kúni: Shymkentte teatrlandyrylǵan qoıylymdar kórsetilmek

ShYMKENT. QazAqparat - Shymkentte Abaıdyń 175 jyldyǵyna arnalǵan birneshe is-shara uıymdastyrylýda, dep habarlaıdy QazAqparat tilshisi.

Atap aıtqanda, qalalyq kitaphanalarda «Álem tanyǵan uly Abaı», «Abaı danalyǵy – halyq murasy», «Elim - jerim dep, bar ǵumyryn pash etken Uly tulǵa», «Abaıdyń sózi –qazaqtyń boıtumary» atty onlaın kitap oqý, ádebı sazdy keshter men vırtýaldy kitap kórmeleri ótkiziledi. Al, ádet-ǵuryp jáne salt-dástúr ortalyǵynda «Abaıdy qalaı tanydym?!» atty tanymdyq tárbıe saǵaty uıymdastyrylmaq. J.Shanın atyndaǵy akademııalyq qazaq drama teatry «Uly Abaıǵa - 175 jyl, Abaı beınesi» «Parasat» ordeniniń ıegeri, Qazaqctannyń eńbek sińirgen ártisi Sapar Ótemisulymen onlaın-efırin ótkizýdi josparlap otyr. Sol sııaqty qalalyq orys drama teatry da «Abaı joly» onlaın-baǵdarlamasyn, qalalyq ózbek drama teatry M.Áýezovtiń «Abaı» onlaın-dramasyn, qalalyq opera jáne balet teatry «Abaı armany» onlaın-kontsertin kórermenge usynbaq.

Qalalyq ázil jáne satıra teatry «Júregim neni sezesiń?!» atty poetıkalyq-dramalyq qoıylymyn, qýyrshaq jáne jasóspirim teatry «Dara tulǵa» onlaın-poetıkalyq dramasyn, Shymkent-tsırki «X-BAND» djaz orkestriniń onlaın-kontsertin Instagram jáne Facebook paraqshalary men Youtube arnasynan kórsetpek.