Abaı Qunanbaıulynyń 165 jyldyǵyna arnalǵan «Abaı álemi» atty ádebı-mýzykalyq kesh ótti
ASTANA. Tamyzdyń 26-sy. QazAqparat /Jasulan Amanbaıuly/ - Keshe keshke Astanadaǵy Beıbitshilik jáne kelisim saraıynda qazaqtyń uly aqyny, oıshyly Abaı Qunanbaıulynyń 165 jyldyǵyna arnalǵan «Abaı álemi» atty ádebı-mýzykalyq kesh ótti, dep habarlaıdy QazAqparat.
Osy kúnderi Astana ákimdigi qalada Abaı Qunanbaıulyna arnalǵan merekelik kúnderdi atap ótý sharalary: Abaı oqýlaryn, onyń eskertkishine gúl shoqtaryn qoıý jáne kontsertter uıymdastyryp jatyr. Kesh atalmysh sharalar tsıkliniń aıasynda ótkizildi.
Saraı sahnasynda qala qonaqtary men turǵyndary nazaryna Abaıdyń «Maı túni», «Kózimniń qarasy», «Tatıananyń áni», «Aıttym sálem, Qalamqas», syndy tanymal aqyndyq jáne mýzykalyq týyndylary, sonymen qatar Latıf Hamıdıdiń «Abaı» operasynan arııalar usynyldy.
Qazaqtyń bas aqyny - Abaıdyń shyǵarmalaryn Qazaqstannyń halyq ártisteri, elge eńbekteri sińgen mádenıet qaıratkerleri Qııaqbaı Asambaev, Janat Shybyqbaev, Qaırat Baıbosynov, sondaı-aq respýblıkalyq jáne halyqaralyq baıqaýlardyń laýreattary Erbol Sádýaqas, Perızat Turarova, Bátıma Izenaeva, Danııar Muqan, Azamat Jyltyrkózov oryndady.
Ártisterge Bas dırıjer, QR Eńbek sińirgen mádenıet qaıratkeri, professor Aıtqalı Jaıymovtyń jetekshilik etýimen, Astana halyq aspaptary memlekettik fılarmonııasynyń orkestri mýzykalyq súıemeldeý jasady.
