Abaı Qunanbaıulynyń 180 jyldyǵy: Ulytaýlyqtar uly oıshyldyń rýhyna taǵzym etti
JEZQAZǴAN. KAZINFORM - Búgin Ulytaý oblysynda qazaqtyń uly oıshyly, kemeńger aqyn Abaı Qunanbaıulynyń 180 jyldyq mereıtoıyna arnalǵan Uly Abaıdy ulyqtaý kúni saltanatty túrde atalyp ótti. Іs-shara Abaı eskertkishi janynda ótti.
Mereke S. Qojamqulov atyndaǵy teatr ártisteriniń teatrlandyrylǵan qoıylymymen bastalyp, kórermenderge uly aqynnyń ómiri men murasy jaıly taǵylymdy kórinis usynyldy. Arnaıy daıyndalǵan alańda Abaıdyń kitaptary, sýretteri jáne shyǵarmashylyq murasyna qatysty kórmelik ekspozıtsııalar kópshilik nazaryna usynyldy.
Oblys ákiminiń orynbasary Zına Aqylbekova quttyqtaý sózinde Abaıdyń halyq rýhanııatyndaǵy aıryqsha ornyn atap ótip, onyń ósıet-ónegesi ár urpaqqa jol kórsetetin shamshyraq ekenin jetkizdi. Sondaı-aq, Ulytaý oblystyq ardagerler keńesi tóraǵasynyń orynbasary, abaıtanýshy Bekbolat Esenov jınalǵandarǵa júrekjardy lebizin bildirdi.
Saltanatty jıyn aıasynda «Abaı-dana, Abaı-dara» atty aqyndar múshaırasynyń jeńimpazdary marapattaldy. Bas júldeni Abaı atyndaǵy mamandandyrylǵan mektep-ınternatynyń ustazy Janat Ábdiǵojın ıelendi. Júldegerler sahnada óz óleńderin oqyp, kópshilik qoshemetine bólendi.
Zııaly qaýym ókilderi men turǵyndar Abaı eskertkishine gúl shoqtaryn qoıyp, uly oıshyldyń rýhyna taǵzym etti. Abaıdyń týǵan kúni qarsańynda eskertkish mańynda onyń ánderi shyrqalyp, óleńderi oqyldy.
Aıta keteıik, «Abaı kerýeni» ádebı sapary 4 tamyzda Jezqazǵan qalasynda bastalyp, Ulytaý, Jańaarqa aýdandary, Qarajal, Sátbaev qalalary jáne Jáırem kentinde jalǵasty. Maqsat – Abaıdyń murasyn keńinen nasıhattaý.
