Abaı kúni: Zııaly qaýym ókilderi uly qazaq oıshylynyń eskertkishine gúl shoqtaryn qoıdy
ALMATY. KAZINFORM – Almatylyqtar Abaı eskertkishine gúl shoqtaryn qoıdy. Іs-shara Abaı alańynda ótti. Oǵan Májilis depýtattary, Almatydaǵy QHR Bas konsýly Tszıan Veı, aqyn-jazýshylar men qala turǵyndary qatysty.
«Uly aqyn Abaı Qunanbaıulynyń týǵan kúni – elimiz úshin erekshe kún. Óıtkeni aqynnyń shyǵarmashylyǵymen birneshe urpaq sýsyndap ósti. Abaıdyń esimi qazaq halqyna ǵana emes, búkil álemge máshhúr. Bolashaq urpaqtyń osyndaı kezdesýdi jıi ótkizip, Abaıdy eske alyp otyrýy óte mańyzdy. Stýdentterdiń onyń óleńderin jatqa oqýy, aqynǵa degen súıispenshiligi qýantady», - dedi Qasymhan Begmanov.
Budan keıin «Adamzattyń Abaıy» atty jyr músháırasy ótip, Abaı Qunanbaevtyń eń tanymal ári qazaqstandyqtar súıip oqıtyn shyǵarmalarynan úzindiler oqyldy, sondaı-aq kitaptar men etnoónimder kórme-jármeńkesi uıymdastyryldy.
«Abaı – qazaqtyń kórnekti aqyny, jazýshysy, oıshyly jáne fılosofy. Onyń dál ári kórkem tili fılosofııalyq oıǵa toly, shyǵarmalarynda qazaq halqynyń rýhy men kúshin beıneleıdi. Ol qazaq halqynyń maqtanyshy ǵana emes, búkil álemde joǵary bedelge ıe. Beıjińde de Abaıǵa eskertkish qoıylǵan. Aqyndy osylaısha birge qasterleý Qazaqstan men Qytaı arasyndaǵy ózara túsinistikti nyǵaıtatyn mańyzdy mádenı kópir qalyptastyrady», - dedi Tszıan Veı.
Budan bólek, Abaıdyń týǵan kúnine oraı «Alataý» dástúrli óner teatrynda «Abaı álemi» atty kontsert-spektakl ótedi. Rejısser Farhad Moldaǵalıdyń basshylyǵymen Bolat Ábdilmanov, Erlan Bilál, Núrken Óteýil syndy tanymal akterler uly aqynnyń ómirinen syr shertip, Abaı shyǵarmashylyǵyndaǵy jahandyq taqyryptardy qozǵaıdy.
Qalanyń oqý ortalyqtary men kitaphanalarynda Abaıdyń óleńderi men qara sózderin mánerlep oqý baıqaýlary ótip jatyr.
