Semeıde Abaı kúnine oraı 35 metrlik Rámizder alańy ashyldy
SEMEI. KAZINFORM - Búgin Semeı qalasynda Abaı kúnine oraı Memleket basshysy Qasym-Jomart Kemeluly Toqaevtyń qoldaýymen júzege asyrylyp jatqan «Abaıǵa qurmet» aktsııasy aıasynda boı kótergen Rámizder alańy – qoǵamdyq-mádenı keńistiginiń saltanatty ashylý rásimi ótti.
Sharaǵa oblys ákimi Berik Ýálı, Soltústik Qazaqstan oblysy ákiminiń orynbasary Nurlan Keńesov qatysty.
Aımaq basshysy quttyqtaý sózinde Rámizder alańynyń ashylýy óńiraralyq yntymaqtastyq pen ulttyq birliktiń jarqyn kórinisi ekenin atap ótti. Prezıdenttiń bastamasyn alǵashqylardyń biri bolyp qoldap, Semeıge Rámizder alańynyń salynýyna sebep bolǵan Soltústik Qazaqstan halqyna, osy óńirdiń ákimi Ǵaýez Nurmuhammedovke oblys jurtshylyǵy atynan alǵys aıtty.
-Búgin, uly aqynnyń týǵan kúninde Soltústik Qazaqstan oblysynyń óńirimizge syılyǵy – Rámizder alańyn saltanatty túrde ashqaly turmyz. Erekshe atap óterligi, bul – aktsııa aıasynda paıdalanýǵa berilip otyrǵan alǵashqy nysan. Kúlli Abaı óńiriniń turǵyndaryn qýanyshty sátpen shyn júrekten quttyqtaımyn. Ózderińiz kórip otyrǵandaı, Rámizder alańy qysqa merzim ishinde, nebary alty aıǵa jetpeıtin ýaqytta Beıbitshilik (Túıemoınaq) aralynda boı kóterdi. Bul aralda qyryq jyl boıy dalamyzǵa ýyn shashqan atom synaqtarynyń toqtaýyna oraı bıiktigi 20 metrlik «Ólimnen de kúshti» monýmenti turǵyzylsa, ıadrolyq polıgonnyń jabylǵanyna 20 jyl tolǵanda bıiktigi 25 metr bolatyn Beıbitshilik stellasy boı kóterdi. Endi, mine, Abaı oblysy qaıtadan shańyraq kótergen tusta, el Táýelsizdiginiń 35 jyldyǵyna oraı bıiktigi 35 metr bolatyn Rámizder alańy salyndy.
Bıyl jazda meniń tapsyrmammen «Ólimnen de kúshti» monýmenti men Beıbitshilik stellasyna kúrdeli jóndeý júrgizilip, jańartylyp, abattandyryldy. Bul úsh taǵan qasıetti Beıbitshilik aralyna endi tolyq maǵyna berip, qalanyń kórkin ashyp, tarıhyn baıytyp, qala turǵyndary men qonaqtary demalatyn tamasha saıabaqqa aınalady dep senemiz.
Basa nazar aýdaryp aıta ketetin bir jaıt, búgingi kúnge deıin resmı tý kóterý rásimi ár tusta oryndalyp keldi. Dál osy sátten bastap mundaı mártebeli jıyndar ózimiz turǵan ásem alańqaıda ótetin bolady. Bul alańnyń ashylýyn «Abaı kúnimen» tuspa-tus josparlaǵan edik. Mine, búgin biz aıtqan sózimizde turyp, Rámizder alańyn saltanatty túrde ashyp otyrmyz, – dedi Berik Ýálı.
«Rámizder alańy» – Memlekettik Tý, Eltańba men Ánurandy birtutas sáýlettik ansamblge biriktirgen jańa qoǵamdyq keńistik. Alańnyń jalpy aýmaǵy 2 gektardy quraıdy. Nysan dóńgelek pishinde jobalanǵan, dıametri – 28 metr. Kompozıtsııanyń negizgi bóligi – bıiktigi 35 metrlik memlekettik Tý tuǵyry. Eltańba men Ánuran mátini 10 metr bıiktikte ornalasqan. Alańda jaıaý júrginshilerge arnalǵan keńistik, demalys oryndary, oryndyqtar men kógaldandyrylǵan gúlzarlar qarastyrylǵan.
Aldaǵy ýaqytta Beıbitshilik aralynda Prezıdenttiń arnaıy tapsyrmasyna sáıkes qala turǵyndarynyń qolaılylyǵy úshin kólemi 56 gektar bolatyn Ekologııalyq saıabaq salynbaq.
Saltanatty sharada sóz sóılegen Soltústik Qazaqstan oblysy ákiminiń orynbasary Nurlan Keńesov óńir basshysy Ǵaýez Nurmuhambetovtiń quttyqtaý tilegin jetkizdi.
Shara barysynda Rámizder alańynyń boı kóterýine eleýli úles qosqan birqatar azamattarǵa Abaı oblysy ákimi men SQO ákiminiń Alǵys haty tabystaldy. Sondaı-aq, saltanatty sharada belgili ánshiler Ibragım Eskendir men Qýandyq Rahym óner kórsetip, patrıottyq ánderdi shyrqady.
