Abaı kúni: merekelik kontsertte 15-ten asa bala joǵalǵan
ASTANA. KAZINFORM — Abaı Qunanbaıulynyń 180 jyldyǵyna arnalǵan merekelik kontsert ótip jatqan Qaraýyl aýylynda 20 myńnan astam oblys turǵyndary men qonaqtary, onyń ishinde sheteldik týrıster jınaldy.
Oblystyq polıtsııa departamenti baspasóz qyzmetiniń málimetinshe, adamdar kóp shoǵyrlanǵan jaǵdaıda polıtsııa qyzmetkerleri qyzmet atqarýdyń kúsheıtilgen rejımine kóshti. Erekshe nazar kámeletke tolmaǵandardyń qaýipsizdigine aýdaryldy.
— Bir ǵana keshtiń ishinde 15-ten astam bala joǵalý deregi tirkeldi. Olardyń barlyǵy der kezinde tabylyp, ata-analaryna aman-esen tapsyryldy. Balalardy jedel izdestirý maqsatynda polıtsııa qyzmetkerleri oqıǵa ornynan tikeleı efırge shyǵyp, olardyń beıneleri kontsert sahnasynyń úlken ekranynda kórsetildi. Bul ata-analarǵa balalaryn birden tanyp, olarǵa jetýine múmkindik berdi, — delingen oblystyq PD taratqan aqparatta.
Patrýldik polıtsııa batalony merekelik is-shara ótetin orynǵa kireberis joldardaǵy jaǵdaıdy baqylap, avtokólikterdiń retsiz qozǵalysyna jol bermeı, jaıaý júrginshilerdiń qaýipsizdigin qamtamasyz etip jatyr.
— Kúsheıtilgen rejımdegi jumys jalǵasyp jatyr, — dep atap ótti Abaı oblysy Polıtsııa departamenti bastyǵynyń orynbasary, polıtsııa polkovnıgi Ernar Bazarov.
Osyǵan deıin Abaı oblysynda «Abaı kúni» merekesi bastalǵanyn jazǵan edik.
Abaı oblysynyń ákimi Berik Ýálı Abaı aýdany Qaraýyl aýylyna jınalǵan halyqty «Abaı kúni» merekesimen quttyqtady.
Abaıdyń 180 jyldyǵyna arnalǵan onkúndik mereıtoılyq sharalardyń sońǵy kúni dál qazir aqynnyń týǵan jeri — Abaı aýdanynda ótip jatyr. Sol toıdyń keı sátterin Kazinform tilshisi nazarlaryńyzǵa usynady.