«Abaı qyrandary» Ózbekstandaǵy halyqaralyq jarysta ekinshi oryn aldy
ASTANA. KAZINFORM — Abaı oblysynyń «Jas sarbaz» balalar-jasóspirimder áskerı-patrıottyq qozǵalysynyń tárbıelenýshileri Chırchık qalasynda ótken «Vatanparvarlar» halyqaralyq áskerı-sporttyq jarysynda ІІ oryn enshiledi, dep habarlaıdy Qorǵanys mınıstrliginiń baspasóz qyzmeti.
Ózbekstan Qorǵanys mınıstrligi jarysty aty ańyzǵa aınalǵan qolbasshy Ámir Temirdiń 690 jyldyǵyna arnady. Qurlyq áskerleri ınstıtýtynyń bazasynda ótken jarystarǵa Ázerbaıjan, Belarýs, Qazaqstan, Qyrǵyzstan, Tájikstan, Reseı jáne Ózbekstan komandalary qatysty.
Saıysta beltemirge tartylý, AK-74 avtomatyn shashyp-qurastyrý boıynsha normatıvterdi, biryńǵaı kedergiler jolaǵynda baqylaý jattyǵýyn oryndady, myltyq atý jáne alǵashqy medıtsınalyq kómek kórsetýde daǵdylaryn pash etti. Shyǵarmashylyq kezeńde olar ózderiniń jan-jaqty talanttary men qabiletterin pash etti.
Jalpy komandalyq esepte jeti eldiń ishinen birinshi oryndy Ózbekstan quramasy ıelendi. Qazaqstan komandasy ekinshi oryn enshiledi. Úshinshini Qyrǵyzstan men Belarýs elinen kelgen jas patrıottar ózara bólisti.
— Jastarymyzdyń bul jetistigi «Jas sarbaz» balalar-jasóspirimder qozǵalysynyń jáne halyqaralyq mártebege ıe bolǵan «Aıbyn» jastar jıynynyń damyp kele jatqanyn aıǵaqtaıdy. Bul saıysqa degen qyzyǵýshylyq jyl saıyn artyp keledi. Qatysýshy elderdiń kóbeıip kele jatqany oǵan dálel. Udaıy jattyǵýlar men básekelestik tájirıbe bizdiń komandaǵa Ózbekstan jerinde de nátıjeli óner kórsetýge yqpal etti, — dedi Qarýly kúshter Ulttyq áskerı-patrıottyq ortalyǵynyń bastyǵy, Qazaqstannyń eńbek sińirgen qaıratkeri Arman Ásenov.
«Abaı qyrandary» klýbynyń tárbıelenýshileri áskerı-qoldanbaly estafetada, arqan tartysta jáne shyǵarmashylyq baıqaýda úzdik nátıje kórsetti. Sonymen qatar, olar myltyq atý, beltemirge tartylý, AK-74 avtomatyn shashyp-qurastyrý jarystarynda ekinshi oryn aldy. Alǵashqy medıtsınalyq kómek kórsetý kezeńinde úshinshi orynǵa turaqtady.
El namysyn qorǵaǵan komanda quramynda 14 oqýshy boldy. Jarysqa daıyndyq Semeı qalasynyń 44793 áskerı bóliminde ótkizildi.
Buǵan deıin Qorǵanys mınıstrligi áskerge shaqyrý, medkomıssııa jáne keıinge qaldyrý tártibin túsindirdi.
