Abaı qalasynda sábılerge qol kótergen tárbıeshi 40 táýlikke qamalýy múmkin
ABAI. QazAqparat - Oqıǵa Abaı qalasyndaǵy «Ádemi» balabaqshasynda bolǵan. Áleýmettik jelini shýlatqan vıdeoda tárbıeshi búldirshinderdi jelkesinen nuqyp, basynan uryp jatqanyn kórýge bolady. Balalardyń ata-analary oqıǵany kópshilik nazaryna shyǵarýdy sheshken, dep habarlaıdy QazAqparat.
Boljam boıynsha oqıǵa Naýryz meıramyn atap ótý kezinde bolǵan. Sebebi vıdeoda tárbıeshiniń ulttyq kostıýmde júrgenin baıqaýǵa bolady.
Balabaqshada ornatylǵan beınekameralardaǵy jazbany qaraý barysynda ata-analardyń biri tárbıeshi eki balany basynan sál uryp jibergenin baıqaıdy.
Anyqtap qaraǵanda ol óziniń balasyn tanıdy.
«Mundaı vıdeolardan keıin balalardy balabaqshaǵa jiberýge qorqamyz», - dep jazady abaılyqtar áleýmettik jelilerde.
«Pandemııaǵa baılanysty ata-analarǵa balabaqshalarǵa kirýge tyıym salyndy. Basshylyq tarapynan da baqylaý álsiz, tamaqtanýdy eshkim baqylamaıdy. Ata-analar kútpegen jerden jáne 3-5 adamnan kelip, baqylaý júrgizýi kerek. Kishkentaı balalar ata-analaryna tárbıe, qarym-qatynas jáne tamaqtaný sharttary týraly kóp nárse aıta almaıdy», - deıdi jergilikti turǵyndar.
Abaı aýdanynyń bilim bólimi bul oqıǵa qatysty tekseris bastalǵanyn habarlady.
«Ádemi» balabaqshasy jekemenshik jáne Abaı aýdanynyń bilim bólimine baǵynyshty emes. Jeke baqsha 2021 jyldyń aqpan aıynda ashyldy, 550 orynǵa eseptelgen. Atalǵan fakti boıynsha komıssııa qurylyp, qaraý qorytyndysy boıynsha qajetti sharalar qabyldanady», - deıdi bilim bólimi.
Tárbıeshiniń áreketin polıtsııa da tergep jatyr.
«Atalǵan fakt QR QK-niń 140-babynda kózdelgen qylmystyq quqyq buzýshylyq quramynyń belgileri boıynsha Abaı aýdanynyń PB-de tirkeldi. Sotqa deıingi tergeý barysynda polıtsııa qyzmetkerleri 20 jastaǵy kúdiktini anyqtady. Tergeý amaldary júrgizilip jatyr», - dep habarlady Qaraǵandy oblysy PD baspasóz qyzmeti.
