Abaı qalasynda otbasy kúnine oraı kezekte turǵan 37 januıa baspanaly boldy
QARAǴANDY. QazAqparat – Qaraǵandy oblysynyń Abaı qalasynda kezekte turǵan 37 adam jańa bes qabatty úıde qonys toıyn toılaıdy. Olar jańa baspanasyn «Nurly jer» memlekettik baǵdarlamasy boıynsha Otbasy banki arqyly rásimdedi, dep habarlaıdy QazAqparat tilshisi.
Jańa qonystanýshylarǵa kiltti Abaı aýdanynyń ákimi Baýyrjan Asanov tabys etti.
«Sizderdiń ómirińizdegi mańyzdy oqıǵa – baspanaly bolýlaryńyzben shyn júrekten quttyqtaımyn! Sizderge berilip otyrǵan úı óte jaqsy. Ár kireberiste múmkindigi shekteýli azamattar úshin jaǵdaı jasalǵan. Úlken otbasylar turatyn úlken páterlerde eki vanna bólmesi jáne eki balkon bar. Barlyqtaryńyzǵa baqyt pen amandyq tileımin!» – dep Baýyrjan Asanov jańa qonys ıelerin quttyqtady.
35 jastaǵy Araı Qaıýpova tórt bólmeli páterdiń ıesi atandy.
Ol 2014 jyldan bastap memlekettik qordan úı alýǵa kezekte turǵan jáne «Nurly jer» ıpotekalyq kredıt berý baǵdarlamasyn paıdalanýǵa bel býǵan.
«Men kitaphanashy bolyp jumys isteımin. Bizdiń jalaqymyz az. Meniń úsh balam bar, tolyq emes otbasymyz. Buǵan deıin bizde óz úıimiz bolǵan joq, biraq árqashan baspanaly bolýdy armandaıtynbyz. Sondyqtan men jeńildetilgen nesıe baǵdarlamasyn paıdalanýdy uıǵardym, sebebi qarapaıym ıpotekaǵa shamam kelmeıdi. Endi aıyna 57 myń teńge tóleımin. Esesine otbasymda jóndeýden ótken, tamasha tórt bólmeli páter bar, úımiz úlken jáne jaryq», – dedi Araı.
27 jastaǵy Anna Cherpakova Abaıdaǵy jedel járdem stantsııasynda feldsher bolyp jumys isteıdi. Ol da «tolyq emes otbasy» sanaty boıynsha turǵyn úı kezeginde turǵan.
«Meniń bir balam bar, biz buryn anammen birge turatynbyz. Biraq men óz páterim bolǵanyn armandadym, ony jaıly etip jabdyqtaǵym keldi. Sondyqtan men 15 jylǵa úsh bólmeli páter rásimdedim. Aı saıyn 48 myń teńgeden tóleımin. Bul men úshin qolaıly soma, sebebi tipti jalǵa alǵannyń ózinde bul somadan kóbirek qarajat ketedi», – dep atap ótti Anna.
«Nurly jer» memlekettik turǵyn úı qurylysy baǵdarlamasy boıynsha Abaıǵa kire beriste toǵyz qabatty eki úıdiń qurylysy júrip jatyr.
Sondaı-aq, 30a oramynda taǵy bir bes qabatty úıdiń qurylysy bastaldy.
Jeke ınvestıtsııa esebinen tórtinshi shaǵyn aýdandaǵy turǵyn úı qalpyna keltirilip, Jeńis dańǵylyndaǵy kópqabatty turǵyn úıdiń qurylysy bastaldy.
