Abaı ilimi: SQO-da «Tolyq adam» spektakli kórermenge jol tartty
Petropavldaǵy S.Muqanov atyndaǵy qazaq sazdy-drama teatry bir jyldyq úzilisten keıin óz kórermenderimen qaýyshty. Karantın ýaqytynda qol qýsyryp otyrmaı, Abaıdyń ilimine negizdelgen mazmuny tereń, maǵynasy zor qoıylymdy sahnaǵa ázirledi. Óner súıer qaýymnyń nazaryna «Tolyq adam» spektaklin usyndy.
«Abaı Qunanbaevtyń «Júregińniń túbine tereń boıla, men bir ǵajap adammyn ony da oıla», - dep, bizge qaldyrǵan ósıetin uǵyna aldyq pa? Byltyr 175 jyldyq mereıtoıyn atap ótken Abaıdyń qazynasyn qanshalyqty ıgerdik, jan-dúnıesin tolyq túsine aldyq pa? Muny búgin ár qazaq ózine qoıýy tıis. Abaı zamanynda aıtyp ketpek bes asyl is pen bes dushpan búgin de ózektiligin joıǵan joq. Bizdiń maqsat – kórermenge oı salý», - deıdi S.Muqanov atyndaǵy qazaq sazdy-drama teatrynyń dırektory Birjan Jalǵasbaev.
El Táýelsizdiginiń 30 jyldyǵyna oraı sahnalanǵan «Tolyq adam» spektakli fars, grotesk, karıkatýra janrlaryn biriktiredi. Qoıylymnyń basty rejısseri, ózindik qoltańbasy bar, qazaqstandyq rejısserlerdiń jańa tolqynynyń jarqyn ókili – Farhat Moldaǵalı. Spektaklde 16 akter oınady.
Spektakldiń ıdeıasy - Abaıdyń óz zamanynda aıtyp ketken oılaryn búgingi jastar qalaı túsinedi, uly aqyn iliminen ne túıedi. Akterlik quramnyń ónerin kórermen joǵary baǵalady.
