Abaı fılosofııasy jáne zamanaýı bıznes: Elordada múmkindigi shekteýli kásipkerler týraly biregeı kitap jaryq kórdi
ASTANA. KAZINFORM — Elordadaǵy Nazarbaev Ýnıversıtetinde múmkindigi shekteýli kásipkerlerdiń ómir joly men tabysqa jetý tarıhy baıandalǵan «Tolyq adamnyń 45 kelbeti» atty kitaptyń tusaýkeseri ótti.
Jınaqqa elimizdiń túkpir-túkpirinen jınalǵan 45 kásipkerdiń taǵdyry engen. Joba avtorlarynyń aıtýynsha, bul keıipkerlerdiń qajyrly eńbegi Hakim Abaıdyń «Tolyq adam» kontseptsııasynyń zamanaýı kórinisi ispettes.
Jıynda Nazarbaev Ýnıversıtetiniń prezıdenti, professor Ahmat Vakar árbir adamnyń qoǵamda óz orny bar ekenin aıtty.
— Abaı Qunanbaevtyń «Ketigin tap ta, bar qalan!» degen dana sózin eske salǵym keledi. Bul qarapaıym óleń joldarynda tereń maǵyna jatyr. Árqaısymyzdyń bul dúnıede óz ornymyz bar jáne qoǵam tek saýsaqpen sanarlyq adamdar tabysqa jetkende emes, árbir jan óz ornyn taýyp, abyroımen eńbek etkende ǵana qýatty bolady. Búgin biz tek kitaptyń shyǵýyn emes, naǵyz tulǵalardy ulyqtap otyrmyz, — dedi Ahmat Vakar.
Zertteý jobasynyń jetekshisi, professor Shýmaılo ıÝsýfzaı 2019 jyly Qazaqstanǵa kóship kelgende kóshelerden erekshe qajettiligi bar jandardy kóp keziktirmegenin aıtty. Dál osy jaǵdaı zertteýge ıtermelegen eken. Ol júıeli izdenistiń nátıjesinde Abaı fılosofııasyn is júzinde qoldanyp júrgen kásipkerlerdi tapqanyn jetkizdi.
Kitap keıipkerleriniń biri, belgili sýretshi Anara Abjanova óziniń 28 jyldyq shyǵarmashylyq jolyndaǵy jetistikterimen bólisti.
— Men Almaty qalasynan keldim. Óner salasynda júrgenime 28 jyl boldy. Meniń kartınalarym Parıjdegi Lývr galereıasynda, Japonııa elinde jáne AQSh-ta Nıý-Iork qalasynda kórmege qoıyldy. Astana qalasyndaǵy úlken jarnamalyq panolar — meniń jumystarym. Meniń basty qundylyǵym — ulttyq biregeılik, — dedi Anara Abjanova.
Jıynda sóz alǵan taǵy bir kásipker, 20 jyldan astam ýaqyt omarta sharýashylyǵyn dóńgeletip otyrǵan Vladımır Lvov joba aıasyndaǵy trenıngterdiń mańyzyna toqtaldy.
— Shynymdy aıtsam, 4 kún ishinde adamnyń sanasy osynshalyqty ózgeredi dep oılamaǵan edim. Buǵan deıin mende ózim túsine almaıtyn keıbir ishki kedergiler bolǵan. Mundaǵy ustazdarmen jumys isteý barysynda men óz kúıimdi, túsinbegen tustarymdy aıqyndap aldym. Endi óz bıznesimdi qalaı jaqsartý kerek, adamdarmen qalaı jumys istep, marketıngti qalaı júrgizý kerek degen naqty bilim qalyptasty, — dedi Vladımır Lvov.
Aıta keteıik, kitap alǵashqyda aǵylshyn tilinde jazylyp, keıin qazaq tiline aýdarylǵan.
Buǵan deıin Qaraǵandydaǵy ınklıýzıvti art-kafe ashylǵanyn jazǵan edik.
