Abaı esimi Úndistan ádebıetinde de tanymal – Elshilik

ASTANA. QazAqparat – Abaı shyǵarmalary hındı tilinde «Shabd manjýsha» ataýymen jaryq kórdi. Bul týraly Qazaqstandaǵy Úndistan elshiliginen málim etti, dep habarlaıdy QazAqparat tilshisi.

«10 tamyz – qazaq aqyny, fılosofy, mýzykanty, qoǵam qaıratkeri, qazaq jazba ádebıetiniń negizin qalaýshy Abaı Qunanbaıulynyń týǵan kúni. Abaı shyǵarmashylyǵy gýmanızm men aǵartýshylyq, meıirimdilik pen ádildik, halyqqa qyzmet etý jáne ulttyń jeke tulǵadan basym bolýy ıdeıalaryna toly», - dep jazdy elshilik Instagram jelisinde.

Sonymen birge elshilik Abaı Úndistannyń ádebıet salasynda da tanymal ekenin jetkizdi.

«2 maýsymda Nıý-Delıde Qazaqstan men Úndistan arasyndaǵy dıplomatııalyq qatynastardyń 30 jyl tolýyna oraı Abaı Qunanbaıuly músini ashyldy. Úndistannyń astanasy Delıdegi eń úlken kóshelerdiń biri Abaıdyń esimimen atalady. Úndistannyń mádenı baılanystar keńesiniń (ICCR) kómegimen 40 óleń men 45 tárbıelik sózden turatyn Abaı shyǵarmalarynyń hındı jınaǵy jaryq kórdi. Kitap»Sózderdiń qazynasy«maǵynasyn bildiretin «Shabd manjýsha» dep atalady», - deıdi Úndistan elshiligi.

Aıta keteıik, búgin Qazaqstanda Abaı kúni atalyp ótýde. Bıyl qazaqtyń uly aqynynyń týǵanyna 178 jyl toldy.

2020 jyly Abaıdyń 175 jyldyq mereıtoıyna oraı 10 tamyz – Abaı kúni bolyp bekitilgen edi.