Abaı dańǵylyn Úlken Almaty aınalma jolyna jalǵaýǵa 600 metr qaldy
ALMATY. KAZINFORM – Almatyda Abaı dańǵyly Úlken Almaty avtomobıl aınalma jolyna (ÚAAAJ) jalǵanady.
Qala ákimdiginiń málimetinshe, Abaı dańǵylynyń qala shekarasynan Raıymbek aýylyndaǵy Súıinbaı kóshesine deıingi bóliginde kólik qozǵalysy ashyldy.
Qazirgi ýaqytta uzyndyǵy shamamen 600 metr bolatyn qalǵan ýchaskeniń qurylysy jalǵasyp jatyr. Jobany tolyq aıaqtap, ÚAAAJ-ǵa kirip-shyǵatyn jol salý úshin birneshe jer telimin satyp alý qajet.
Qalalyq jol ınfraqurylymyn damytý basqarmasy 2027 jyldyń sońyna deıin Almaty oblysy men Almaty qalasynyń aýmaǵynda 5 radıaldy joldyń qurylysyn aıaqtaý josparlanyp otyrǵanyn atap ótti. Onyń ishinde Abaı dańǵyly, Saın, Rysqulov, Soltústik aınalma joly jáne Tilendıev kósheleri tolyǵymen uzartylady.
Sonymen qatar tórt ishki magıstraldyq kósheni uzartý jumystary da aıaqtalýy tıis. Atap aıtqanda: Jubanov, Muqanov, Raıymbek batyr dańǵyldary men Tóle bı kóshesi. Oǵan qosa aldaǵy ýaqytta Sátbaev, Hmelnıtskıı jáne Qajymuqan kóshelerin uzartý jumystary bastalady.
Eske salaıyq, 2021 jyly jeltoqsan aıynda Abaı dańǵylynyń Baýyrjan Momyshuly kóshesinen Alataý kóshesine deıin uzyndyǵy 3,5 shaqyrym ýchaskeniń qurylysy aıaqtalyp, jol ashyldy.
Al 2025 jyldyń mamyr aıynda Abaı dańǵylyn qala shekarasyna deıin uzartý jumystary aıaqtaldy. Al jaqynda qala shekarasynan Almaty oblysynyń Súıinbaı kóshesine deıin kólik qozǵalysy ashyldy.
Almatyda máslıhat sheshimimen 2026 jyly magıstraldyq kóshelerdi uzartýǵa 8 mlrd teńge bólingen bolatyn.