Abaı bolyńyzdar: Petropavlda ınfektsıonıst-dáriger turǵyndarǵa úndeý joldady

PETROPAVL. QazAqparat – Petropavldaǵy juqpaly aýrýlar aýrýhanasynyń ınfektsıonıst-dárigeri Danııar Beısembaev áleýmettik jeli arqyly turǵyndarǵa úndeý joldap, olardy densaýlyǵyna jaýapkershilikpen qaraýǵa shaqyrdy, dep habarlaıdy QazAqparat tilshisi.

Dáýren Beısembaevtyń aıtýynsha, qazirgi túsip jatqan naýqastar men budan birer apta burynǵy syrqattardy salystyrýǵa bolmaıdy. Buryn negizinen emdeý mekemesine vahtamen jumys isteıtinder, júk tasymaldaıtyndar túsip, olarda aýrý belgileri baıqalmaǵan.

Dárigerdiń úndeýin Facebook paraqshasynda Petropavl qalasy ákiminiń baspasóz hatshysy Ásem Aıtolla jarııalady.

«Qazir bizge adamdar koronavırýs ınfektsııasynyń naqty belgilerimen, aýyryp túsip jatyr. Syrqattar - ózimizdiń qala turǵyndary. Olar – sizderdiń kórshilerińiz, tanystaryńyz nemese jaqyn týystaryńyz bolýy múmkin. Koronavırýs indeti qaýiptirek bola bastady. Onymen úlken adamdar ǵana emes, jastar da kóp aýyratyn boldy. Sondaı-aq, naýqastarda buǵan deıin bizge tek ınternet arqyly ǵana belgili bolǵan aýrý belgileri bar, ıaǵnı, entigý, ottegi jetispeýshiligi, aǵzaǵa kishkene fızıkalyq kúsh túskende demalýdyń qıyndaýy. Men sizderdi qorqytqym kelmeıdi, biraq biz qazir qysta qorqa kútken koronavırýsty ınfektsııamen betpe-bet kelip otyrmyz», - dedi dáriger óz úndeýinde.

Osyǵan oraı Dáýren Beısembaev jerlesterin sanıtarlyq talaptardy qatań saqtaýǵa, qoǵamdyq orynda maska taǵyp, adam kóp shoǵyrlanǵan jerge barmaýǵa, araqashyqtyqty saqtap, qoldy zalalsyzdandyryp otyrýǵa, syrqattarmen múmkindiginshe baılanysqa túspeýge shaqyrdy.

«Men sizderden ótinip suraımyn, abaı bolyńyzdar! Ótinemin, abaı bolyńyzdar jáne aýyrmańyzdar!» - dedi Dáýren Beısembaev óz úndeýinde.