Abaı bir ǵasyr buryn ultty jańǵyrýǵa, jańa ómirge beıim bolýǵa shaqyrǵan - Prezıdent

NUR-SULTAN. QazAqparat - Jańǵyrý – ótkennen qol úzip, tek jańa qundylyqtarǵa jol ashý degen sóz emes. Shyn máninde, bul – ulttyq muralarymyzdy búgingi oń úrdistermen úılestire damytýdy kózdeıtin qubylys. Bul rette, biz Abaıdy aınalyp óte almaımyz. Sebebi, uly oıshyl osydan bir ǵasyrdan astam ýaqyt buryn ultty jańǵyrýǵa, jańarýǵa, jańa ómirge beıim bolýǵa shaqyrǵan.

Bul týraly Memleket basshysynyń «Abaı jáne HHІ ǵasyrdaǵy Qazaqstan» atty maqalasynda aıtylǵan.

«Abaıdyń shyǵarmalaryna zer salsaq, onyń únemi eldiń alǵa jyljýyna, ósip-órkendeýine shyn nıetimen tileýles bolǵanyn, osy ıdeıany barynsha dáriptegenin baıqaımyz. Al, ilgerileýdiń negizi bilim men ǵylymda ekenin anyq bilemiz. Abaı qazaqtyń damylsyz oqyp-úırengenin bar jan-tánimen qalady. «Ǵylym tappaı maqtanba» dep, bilimdi ıgermeıinshe, bıikterdiń baǵyna qoımaıtynyn aıtty. Ol «Biz ǵylymdy satyp mal izdemek emespiz», – dep tujyrymdap, kerisinshe, el dáýletti bolýy úshin ǵylymdy ıgerý kerektigine nazar aýdardy. Uly Abaıdyń «Paıda oılama, ar oıla, Talap qyl artyq bilýge» degen ónegeli ósıetin de osy turǵydan uǵynýymyz qajet. Bul tujyrymdar qazir de asa ózekti. Tipti burynǵydan da zor mańyzǵa ıe bolyp otyr. Sebebi, HHІ ǵasyrdaǵy ǵylymnyń maqsaty bıikke umtylý, alysqa qulash sermeý ekenin kórip otyrmyz» deı kele, Memleket basshysy maqalasynda «bizdiń mindetimiz – osy ilgeri kóshke ilesip qana qoımaı, aldyńǵy qatardan oryn alý» ekenin atap ótken.

Sondaı-aq, osy maqsatqa jetýdiń joldaryn aıqyn kórsetken: «Ol úshin, eń aldymen, bilim berý salasyn zamanǵa saı damytýymyz kerek. Sol maqsatta aýqymdy jumystar atqarylǵanymen, otandyq bilim berý isinde áli de olqy tustar bar. Ony jetildirý joldaryn saılaý aldyndaǵy baǵdarlamamda jáne ótken jylǵy tamyz konferentsııasynda naqty atap kórsettim.

«Pedagog mártebesi týraly» zańnyń qabyldanýy – osy baǵyttaǵy ıgi bastamalardyń biri. Bul – sapaly bilim berý isin jetildirýge arnalǵan qadam. Jalpy, kez-kelgen qoǵamda ustazdyń orny bólek. Muǵalimder bilimdi ári sanaly urpaq tárbıeleý isinde asa mańyzdy ról atqarady. Ustazǵa qurmet kórsetip, qadirleý – bárimizdiń mindetimiz. Sondyqtan memleket muǵalim mamandyǵynyń mártebesin kóterip, alańsyz jumys isteýine jaǵdaı jasaýy kerek».

Aıta keteıik, buǵan deıin «QazAqparat» agenttigi Aqordanyń resmı saıtyna silteme jasaı otyryp, Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasyn jarııalaǵan bolatyn.