Abaı Baıgenjın: «Spýtnık V» eń tabysty ázirlemelerdiń biri

NUR-SULTAN. QazAqparat – «Ulttyq ǵylymı medıtsınalyq ortalyq» aktsıonerlik qoǵamynyń basqarma tóraǵasy, medıtsına ǵylymdarynyń doktory Abaı Baıgenjın qazaqstandyqtarǵa salynyp jatqan vaktsınalardyń qaýipsiz ári tıimdi ekenin aıtty, dep habarlaıdy QazAqparat tilshisi.

«Biz Máskeýge arnaıy baryp, professor Gıntsbýrg basqaratyn N.Gamaleıa atyndaǵy ulttyq zertteý ortalyǵynda boldyq. Eki kún ishinde bizge «Spýtnık V» vaktsınasynyń búkil tizbegi men damý mehanızmi kórsetildi. Biz bul vaktsına keńes dáýirinde jasalǵan eń sátti ázirlemelerdiń biri ekenine kóz jetkizdik. Biz koronavırýstyń qandaı qaýipti aýrýy ekenin jaqsy bilemiz. Onymen kúresýdiń vaktsınadan basqa balama joly joq», - dedi medıtsına ǵylymdarynyń doktory.

Ǵalym vaktsına aýrý týǵyzbaıtynyn, óıtkeni ondaǵy vırýs bólshekteri óltirilgen kúıde boltanyn klınıkalyq zertteýler aıqyn kórsetkenin aıtady.

«Elordada vaktsınalaý pýnkterin qoǵamdyq oryndarda ornalastyryp jatqanymyz óte durys. Mundaı pandemııa jaǵdaıynan bárimiz bir baǵytta oılap, vaktsına alsaq qana aman shyǵa alamyz. Qurmetti qala turǵyndary, dárigerler, men sizderdiń áriptesterińizdiń biri retinde, elorda turǵyny retinde vaktsınadan qoryqpaýǵa shaqyramyn», - dedi Abaı Baıgenjın.

Buǵan deıin habarlaǵanymyzdaı, Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov koronavırýsqa qarsy vaktsına egý aldynda antıdenelerdiń bar-joǵyn anyqtaý qajettiligine qatysty pikir bildirgen bolatyn.