Abaı Baıgenjın elimizde alǵash bolyp «Qazaqstannyń eńbek sińirgen dárigeri» ataǵyn aldy
ASTANA. KAZINFORM – Búgin Memleket basshysy Qasym-Jomart Toqaev Respýblıka kúnine oraı bir top azamatty memlekettik nagradalarmen marapattady. Prezıdent qurmetin ıelengen azamattar qatarynda Ulttyq ǵylymı medıtsınalyq ortalyq AQ Basqarma tóraǵasy, medıtsına ǵylymdarynyń doktory Abaı Baıgenjın elimizde alǵash bolyp «Qazaqstannyń eńbek sińirgen dárigeri» ataǵyn aldy.
«Kóńil kúıim keremet, búgin orny erekshe marapatqa ıe boldym. Elimizdiń medıtsına salasynda qyzmet etip júrgen júzdegen, myńdaǵan dárigerler eńbegi elendi dep bilemin. Sebebi bıyl «Qazaqstannyń eńbek sińirgen dárigeri» ataǵy alǵash ret berilip otyr. Men 54 jyl dáriger bolyp kelemin, oqýdy qosqanda 60 jyl. Búgin men alsam erteń jáne odan ári meniń áriptesterim osy ataqty alady, olardyń bári laıyqty», - dedi Abaı Baıgenjın agenttik tilshisine bergen suhbatynda.
Medıtsına salasynda 50 jyldan astam eńbek etip kele jatqan Abaı Qabataıuly úshin «Qazaqstannyń eńbek sińirgen dárigeri» ataǵyn alý, kútpegen syı bolypty.
«Dárigerlerdiń jumysynyń bastalatyn ýaqyty bar, biraq aıaqtalatyn ýaqyty joq», - dep ázildep, aq halatty jandardyń eńbegi eren ekenin aıtty.
Sondaı-aq, qurmetti dáriger elimizde aýyl medıtsınasyna erekshe nazar aýdarylyp jatqany qýantatynyn jetkizdi.
Aıta keteıik, Ulttyq mereke – Respýblıka kúni qarsańynda Prezıdent Qasym-Jomart Toqaevtyń Jarlyǵymen elimizdiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqty nyǵaıtýǵa qosqan eleýli úlesi men belsendi qoǵamdyq qyzmeti úshin bir top azamat memlekettik nagradalarmen marapattaldy.
Olardyń qatarynda bilim berý, densaýlyq saqtaý, mádenıet jáne ǵylym qaıratkerleri, óndiris, bıznes salalarynyń kórnekti ókilderi, depýtattar, memlekettik jáne quqyq qorǵaý organdarynyń qyzmetkerleri, áskerı qyzmetshiler, sportshylar jáne eńbek ardagerleri bar.
