Abaı babamyz qandaı uly bolsa, halyq, zaman synynan múdirmeı ótip kele jatqan Nazarbaev ta sondaı uly tulǵa - B.Jumaǵulov
ASTANA. 29 qarasha. QazAqparat - Abaı babamyz qandaı uly bolsa, halyq, zaman synynan múdirmeı ótip kele jatqan Nazarbaev ta sondaı uly tulǵa.
Bul týraly búgin elordada ótip jatqan «Jańa álemdegi jańa Qazaqstan» atty alǵashqy Nazarbaev oqýlary halyqaralyq forýmynda QR Bilim jáne ǵylym mınıstri Baqytjan Jumaǵulov aıtty.
«... Áýeli - ol zamanda el basy... bolady», dep jazǵan edi uly Abaı. Bolashaqty boljaǵan Abaı babamyz qandaı uly bolsa, halyq, zaman synynan múdirmeı ótip kele jatqan Nazarbaev ta sondaı uly tulǵa! Muny tarıh, muny álem moıyndap otyr», - dedi B.Jumaǵulov.
Sonymen qatar jahandyq saıasat, Qazaqstandaǵy saıası-áleýmettik, ulttyq tatýlyq tájirıbeleri álemdik damý konteksinde qaralatyndyǵyna senim artqan mınıstr: «Kóptegen mysaldar kórsetip otyrǵanyndaı, adamzattyń damýy jańa memleketter qurýdyń sheshýshi kezeńderinde erekshe passıonarlyq jetekshiler paıda bolyp, tarıhqa enip jatady. Olar jańa elder táýelsizdiginiń sımvoldary ǵana emes, sonymen qatar bedeli ornyqqan rýhanı, zııatker kóshbastaýshylar retinde de tanylýda. Olardyń yqpaly jekelegen memleket sheńberinen tys shyǵyp, órkenıettiń damýyna da júıeli túrde yqpaldyq etip jatady. Olar Djordj Vashıngton, Mahatma Gandı, Nelson Mandela, Mustafa Kemal Atatúrik, Mahathır Mohamad jáne basqa da kóshbasshylar. Osyndaı passıonarlyq tulǵalardyń qataryna, sózsiz, Qazaqstan halqynyń álem tanyǵan kóshbasshysy Nursultan Ábishuly Nazarbaev jatady», - dedi.
